(රෝෂන් තුෂාර)

මෙවර මහ මැතිවරණයට කොළඹ දිස්ත්‍රික්කයෙන් ඉදිරිපත් වන අපේක්ෂකයකු සිය මැතිවරණ නිල රථය ලෙස බස් රථයක් භාවිතා කිරීම මැතිවරණ නීති උල්ලංඝනය කිරීමක් යැයි පවසමින් බස් රථයේ රියදුරුට එරෙහිව වැලිකඩ පොලිසිය පවරා තිබූ පැමිණිල්ල කොළඹ අතිරේක මහේස්ත්‍රාත් මංජුල රත්නායක මහතා අද (01) නිෂ්ප්‍රභා කිරීමට නියෝග කළේය.

කොළඹ දිස්ත්‍රික් අපේක්ෂකයකුගේ රුව සහිත පෝස්ටර් ප්‍රදර්ශනය කළ එම්.පි.රංග කුමාර නමැති බස් රථ රියදුරුට එරෙහි නඩුව මෙසේ නිශ්ප්‍රභා කළේය.

අපේක්ෂකයකුට පාවිච්චි කිරීමට නොහැකි වාහන මොනවාදැයි මැතිවරණ පනතේ සඳහන් කර ඇති බව පෙන්වා දුන් මහේස්ත්‍රාත්වරයා ඉදිරිපත් කර ඇති රථය එම ගණයට නොවැටෙන බව සඳහන් කරමින් බස් රථය මුදා හැරීමටද නියෝග කළේය.

අගතියට පත් පාර්ශවය වෙනුවෙන් නීතිඥ සංජීව ඇන්තනී මහතා පෙනී සිටි අතර සැකකාර රියදුරු පදවන බස් රථය මගී බස් රථයක් නොවන බවත්, එය ඡන්ද අපේක්ෂකයා භාවිතා කරන කුඩා ගණයේ බස් රථයක් බවත් සඳහන් කළේය.එසේ රථයක් භාවිතා කිරීම මැතිවරණ නීති උල්ලංඝනය කිරීමක් නොවන බවද සඳහන් කළේය.

දෙපාර්සවයේ කරුණු සලකා බැලූ මහේස්ත්‍රාත්වරයා සැකකරුට බස් රථය මුදා හරිමින් පැමිණිල්ල නිෂ්ප්‍රභ කළේය.

පැමිණිල්ල වෙනුවෙන් වැළකඩ පොලිසිය පෙනී සිටි අතර සැකකරු වෙනුවෙන් නීතිඥ සංජීව ඇන්තනී , අනුරාධ් නාකන්දල ,රජීක කොඩිතුවක්කු , සමින්ද ජයසේකර කැලුම් ඔබේසේකර , ලලින් පතිරන ඇතුළු නීතිඥ මණ්ඩලයක් පෙනී සිටියහ.