ගොවි ගිණුම් අංක වැරැද්දූ නිලධාරීන්ට විනය පියවර

(අංජුල මහික වීරරත්න)

ආසියා සංවර්ධන බැංකුව විසින් මෙරට වී වගා කරන ගොවි ජනතාවට නැවත අයකිරීමකින් තොරව ලබා දීමට පියවර ගත් මූල්‍ය ප්‍රතිපාදන ගොවි ගිණුම්වලට බැර කිරීම සඳහා අවශ්‍ය තොරතුරු නිවැරදිව ලබා නොදුන්  ප්‍රාදේශීය ගොවිජන සේවා නිලධාරීන්ට එරෙහිව දැඩි විනය ක්‍රියාමාර්ග ගැනීමට  ගොවිජන සංවර්ධන දෙපාර්තමේන්තුව තීරණය කර තිබේ.

මෙම මුදල් ප්‍රතිපාදන ගොවි ගිණුම්ගත නොකිරීම සම්බන්ධව කෘෂිකර්ම අමාත්‍යාංශයේ දී පැවැති සාකච්ඡාවකදී කෘෂිකර්ම අමාත්‍ය මහින්ද අමරවීර මහතා මෙි සම්බන්ධයෙන් කරුණු විමසීය.

ආසියානු සංවර්ධන බැංකුව විසින් රුපියල් කෝටි 800ක මුදලක් ගොවි ජනතාවට සහන සැලසීම සඳහා ලබා දුන්න ද ඒවා නිසි කලට වේලාවට ගොවි ජනතාවට ලබා දීමට පියවර ගෙන නොතිබූ බව මෙහිදී අනාවරණය විය.

මෙම ප්‍රමාදය නිලධාරින් පිරිසක් හිතාමතා සිදු කරන ලද කඩාකප්පල්කාරී ක්‍රියාවක් බව පෙනී යන  බව සඳහන් කළ ගොවිජන කොමසාරිස් ජනරාල් එච්. එම්. එල්. ඒ. අබේරත්න මහතා ගොවිජන සංවර්ධන දෙපාර්තමේන්තුවට එවා තිබු ගිණුම්වලින් සියයට 38ක් ම වැරදි ගිණුම් අංක බව සනාථ වී ඇති බවත්, ඒවා නිවැරදි කිරීමට ගොවි ජන සංවර්ධන දෙපාර්තමේන්තුවේ 20 දෙනකුගෙන් සමන්විත කාර්ය මණ්ඩලයක් නැවත යෙද වූ බව ද සඳහන් කළේය.

එමෙන්ම එම  ගොවි ගිණුම්වලින් සියයට අටක අංක තවමත් නිවැරදි කර ගැනීමට නොහැකි වී ඇතැයි ද ඒ සදහා උපරිම උත්සාහ දරන බව ගොවිජන කොමසාරිස් ජනරාල්වරයා සඳහන් කළේය.