(පුෂ්පකුමාර ජයරත්න)
 
රට තුළ පවතින කලබලකාරී වාතාවරණය හේතුවෙන් අද(26) කුරුණෑගල පොලිස් බළ ප්‍රදේශයේ මුස්ලිම් දේවස්ථාන 30 ක පැවැත්වීමට නියමිතව තිබූ සිකුරාදා දේව මෙහෙයන් අත්හිටුවීමට  තීරණය කළ බව කුරුණෑගල මැලේ ජුම්මා මුස්ලිම් දේවස්ථානයේ පැවති විශේෂ සාකච්ඡාවකදී මුස්ලිම් මව්ලවිවරු ප්‍රකාශ කළහ.
 
කුරුණෑගල කොට්ඨාසය බාර පොලිස් අධිකාරි මහින්ද දිසානායක මහතා විසින් කැඳවා තිබූ මෙම විශේෂ සාකච්ඡාව පුත්තලම 143 බළසේනාධිපති බ්‍රිගේඩියර් ධම්මික දිසානායක, කුරුණෑගල 532 බළසේනාධිපති කර්නල් චම්පක රණසිංහ, පළමුවැනි ජාතික ආරක්ෂක බළ මුළුවේ අණදෙන නිලධාරී මංජුල රත්නායක මහත්වරුන්ගේ සහභාගීත්වයෙන් පැවැත්විණි.
 
කුරුණෑගල, වැහැර, නාකළගමුව, පොතුහැර, තෝරයාය, බමුණාවල, මුත්ටතට්ටුගල, තෙලියාගොන්න, මල්ලවපිටිය ප්‍රදේශ ආශ්‍රිතව පිහිටි මුස්ලිම් දේවස්ථාන 30 ක මව්ලවිවරුන් සහ දේවස්ථාන කාරක සභා සභිකයෝ මීට සහභාගී වූහ.
 
රට තුළ සාමය පවත්වා ගැනීමේ අරමුණින් පළමු වරට මේ ආකාරයට සිකුරාදා දේව මෙහෙය අත්හිටුවීමට තීරණය කළ බව මුස්ලිම් මව්ලවිවරු පැවසූහ.