(විමුක්ති එස් රුද්‍රිගු)

බ්‍රසීලයේ වින්හෙඩෝ නගරයට පසුගිය සිකුරාදා කඩා වැටුණු වෝපාස් ලින්හාස් ගුවන් සේවයට අයත් ගුවන් යානයේ ගමන් ගත් 62 දෙදෙනාගේ මළ සිරුරු මුදා ගැනීමේ කණ්ඩායම් විසින් සොයා ගනු ලැබ ඇතැයි එරට බලධාරීහු ප්‍රකාශ කළහ.

ගුවන් අනතුරු හේතුවෙන් මියගිය 62 දෙදෙනාගෙන් 34 ක් පිරිමි පුද්ගලයන් බවත් 28 ක් කාන්තාවන් බවත් බ්‍රසීල බලධාරීහු පැවැසූහ. ගුවන් යානය පියාසර කළ ගුවන් නියමුවන්ගේ සිරුරු මේ වනවිට හඳුනාගෙන ඇති බවත් මළ සිරුරු සාඕ පවුලෝ පොලිස් මෘත ශරීරාගාරයේ තැන්පත් කර ඇති බවත් බ්‍රසීල බලධාරීහු ප්‍රකාශ කළහ.

ගුවන් යානය කඩා වැටුණු අවස්ථාවේ මගීන් 57 දෙනකු සහ කාර්ය මණ්ඩල සාමාජිකයන් සිව් දෙනකු එහි සිට ඇති බවට වෝපාස් ගුවන් සේවය ප්‍රකාශ කළත් පසුව එහි ගණන් නොගත් තවත් එක් මගියෙකු සිට ඇති බවත් ඒ අනුව ඒ.ටී.ආර් 72 වර්ගයට අයත් එම ගුවන් යානයේ මගීන් 58 දෙනකු ගමන් කර ඇති බවත් වෝපාස් ගුවන් සේවය පැවැසුවේය.

අනතුරට ලක්වූ ගුවන් යානය අඩි 17,000 ඉහළ අහසේ පියාසර කරමින් තිබියදී ක්ෂණිකව කඩා වැටී ඇති බවත් අනතුරට හේතුව තවමත් අබිරහසක් බවත් වෝපාස් ගුවන් සේවය ප්‍රකාශ කළේය. අනතුර සිදුවූ අවස්ථාවේ ගුවන් යානය පරානා ප්‍රාන්තයේ කැස්කාවෙල් නගරයේ සිට සාඕ පාවුලෝ ප්‍රාන්තයේ ගුවාරුල්හෝස් වෙත පියාසර කරමින් තිබූ බව එම ගුවන් සේවය පැවැසුවේය.