(අංජුල මහික වීරරත්න)

එල්.ටී.ටී.ඊ චෝදනා සහ පාස්කු ප්‍රහාරයේ චෝදනා මත ආරක්ෂක අංශ අත්අඩංගුවේ සහ රඳවා ගැනීමේ නියෝග මත තබාගෙන සිටින පුද්ගලයන් පිළිබඳ විමර්ශන කඩිනමින් අවසන් කිරීමට රජය තීරණය  කර තිබේ.

ඒ අනුව අදාල  චෝදනා ලැබූ තැනැත්තන් සම්බන්ධයෙන් විමර්ශන කඩිනමින් අවසන් කොට අධිකරණය හමුවේ චෝදනා ගොනු කළ හැකි පුද්ගලයන්ට එරෙහිව චෝදනා ගොනු කිරීමටත්, පුනරුත්ථාපනය කළ යුතු අය පුනරුත්ථාපනය කිරීමටත්, කිසිදු චෝදනාවක් නොමැති පුද්ගලයන් නිදහස් කිරීමටත් අවශ්‍ය පියවර ගැනීමට විදේශ අමාත්‍යාංශය හා අධිකරණ අමාත්‍යාංශය වෙත ජනාධිපති කාර්යාලය  උපදෙස් ලබාදී ඇත.

ජනාධිපති රනිල් වික්‍රමසිංහ මහතාගේ උපදෙස් මත ජනාධිපති කාර්ය මණ්ඩල ප්‍රධානී සාගල රත්නායක, විදේශ අමාත්‍ය අලි සබ්‍රි මහත්වරුන් අධිකරණ අමාත්‍යංශ නිලධාරීන් සමඟ ඉකුත් සතියේ සාකච්ඡ කළ අතර එහිදී  මෙම තීන්දුවට පැමිණ තිබේ.

අදාල චෝදනා සම්බන්ධයෙන් කඩිනමින් නීතිපති උපදෙස් ලබා ගෙන අවශ්‍ය පියවර ගන්නැයි ජනාධිපති කාර්ය මණ්ඩල ප්‍රධානී සාගල රත්නායක මහතා නිලධාරීන්ට උපදෙස් දී ඇත. ඒ අනුව ලබන වසරට පෙර මෙම චෝදනා ලැබූවන් සම්බන්ධයෙන් පියවර ගනු ඇතැයි රජයේ ජ්‍යෙෂ්ඨ ප්‍රකාශකයෙක් පැවසීය.