(සුජිත් හේවාජුලිගේ )

ඖෂධ වර්ග 370ක් ඉන්දීය ණය යෝජනා ක්‍රමය යටතේ ලබාදීමට එරට රජය එකඟවී ඇතැයි සෞඛ්‍ය අමාත්‍ය කෙහෙළිය රඹුක්වැල්ල මහතා ලංකාදීපයට පැවැසීය.

මෙම ඖෂධ වර්ග 370 ලබන මාසයේ මෙරටට ලැබෙනු ඇතැයිද ඔහු සඳහන් කළේය.

මේ අතර මේ රටට අත්‍යවශ්‍යම ඖෂධ වර්ග 14න් හතක් වසරක කාලයක් සඳහා ප්‍රදානයක් ලෙස පිරිනැමීමට චීන රජය බාරගත් බව පැවසූ රඹුක්වැල්ල මහතා චීන රජයේ එම ප්‍රදානය ඉතා සතුටින් බාර ගන්නා බවද ප්‍රකාශ කළේය.

ඖෂධ සම්බන්ධයෙන් යම් යම් අපහසුතා ඇති බව පිළිගන්නේ යැයි ප්‍රකාශ කළ අමාත්‍යවරයා ඖෂධ ප්‍රශ්නය කෙසේ වෙතත් පාලනය කරගත හැකි මට්ටමක පවතින බවද සඳහන් කළේය.

ඖෂධ සම්බන්ධයෙන් කිසිදු තොරතුරක් වසන් නොකරන බවත් සියලු තොරතුරු පාර්ලිමේන්තුවටද දැනුම් දුන් බවත් කෙහෙළිය රඹුක්වැල්ල මහතා වැඩිදුරටත් පැවසීය.

මේ අතර ශ්‍රී ලංකාවට අවශ්‍ය ඖෂධ වර්ග ලයිස්තු ශ්‍රී ලංකාවේ ඉන්දීය මහ මහකොමසාරිස් කාර්යාලයට දැනටමත් බාරදී ඇතැයි සෞඛ්‍ය අමාත්‍යාංශය පවසයි.