ඇමරිකාවෙන් වාර්තා වන කොරෝනා ආසාදිතයින් සංඛ්‍යාව මේ වනවිට මිලියන 7 ඉක්මවා ගොස් තිබේ.

  එම සංඛ්‍යාව 7,185,471ක් ලෙස සටහන් වන අතර එය ලොවපුරා මෙතෙක් වාර්තා වී ඇති කොරෝනා ආසාදිතයින් සංඛ්‍යාවෙන් 20%කට වඩා වැඩි අගයක් ගන්නා බව රොයිටර් පුවත් සේවය පෙන්වා දෙයි.
 
 කොරෝනා ආසාදනය වීම හේතුවෙන් ඇමරිකාවේ සෑම දිනකම 700කට අධික පිරිසක් මියයති.
 
 එරටින් වාර්තා වූ කොරෝනා මරණ සංඛ්‍යාව 200,000 ඉක්මවා ගියේ මීට දින කිහිපයකට පෙරදීය.මිඩිවෙස්ට් ප්‍රාන්තයෙන් වාර්තා වන රෝගීන් සංඛ්‍යාව සැප්තැම්බර් මාසයේදී බෙහෙවින් ඉහළ ගොස් තිබේ.
 
කැලිෆෝනියා ප්‍රාන්තයේ පමණක් කොවිඩ් - 19 රෝගීන් 800,000කට වඩා තහවුරු වී ඇති අතර ටෙක්සාස්, ෆ්ලොරීඩා සහ නිව්යෝර්ක් ප්‍රාන්ත වලින් ද වැඩි රෝගීන් ප්‍රමාණ වාර්තා වී ඇත.
 
 
ඇමරිකාවේ තහවුරු කරගත් කොරෝනා රෝගීන් සංඛ්‍යාව ලෝකයේ වැඩිම රෝගීන් සංඛ්‍යාව වන අතර ඉන්දියාවෙන් රෝගීන් මිලියන 5.7ක් ද බ්‍රසීලයෙන් රෝගීන් මිලියන 4.6ක් ද තහවුරු වී තිබේ.
 
 මේ වනවිට ඇමරිකාවෙන් දිනකට නව රෝගීන් 40,000ක් පමණ වාර්තා වන බවද සෞඛ්‍ය අංශ පෙන්වා දෙයි.
 
 (රොයිටර් පුවත් ඇසුරිණි - 085)