(ඩයනා උදයංගනී)

පුත්තලම, කොළඹ, ගාල්ල සහ හම්බන්තොට හරහා පොතුවිල් දක්වා වන මුහුදු ප්‍රදේශ අද (8) සහ හෙට (9) දිනවලදී විටින් විට රළු විය හැකි බව කාලගුණ විද්‍යා දෙපාර්තමේන්තුව පවසයි.

එම මුහුදු ප්‍රදේශවල උස් රළ ඇතිවිය හැකි අතර වෙරළ ආසන්න ප්‍රදේශයන්හි මුහුදු රළ ගොඩබිමට පැමිණීමේ අවදානමක්ද පවතින බව එම දෙපාර්තමේන්තුව සඳහන් කරයි.

එබැවින් ධීවර ප්‍රජාව සහ වෙරළාසන්න ප්‍රදේශවල පදිංචි ජන්තාව විමසිලිමත් විය යුතු බවද කාලගුණ විද්‍යා දෙපාර්තමේන්තුවේ ප්‍රකාශකයෙක් පැවසීය..

එමෙන්ම සබරගමුව, බස්නාහිර, වයඹ, මධ්‍යම, ඌව, උතුරු මැද සහ දකුණු පළාත්වලට පස්වරු 2.00 න් පසු වැසි හෝ ගිගුරුම් සහිත වැසි ඇතිවන බවද එම ප්‍රකාශකයා කීවේය.

ගිගුරුම් සහිත වැසි ඇතිවන අවස්ථාවල අකුණු අනතුරු හා තාවකාලික තද සුළං ද ඇතිවිය හැකි බැවින් අනතුරු වළක්වා ගැනීමට ක්‍රියා කරන්නැයි කාලගුණ විද්‍යා දෙපාර්තමේන්තුව ජනතාවට දැනුම්දීමක් කරයි.