(නිමල කොඩිතුවක්කු)

රටේ ජනතාවට කොරෝනා එන්නත ලබා දීමටත්, අත්‍යාවශ්‍ය රෝහල් උපකරණ තුලින් සෞඛ්‍ය සේවය ශක්තිමත් කිරීමටත්, කඩා වැටුණු ජන ජීවිත නැවත පිළිසකර කිරීමටත් ඇතුළු බොහෝ ජනතාවාදී කටයුතු තිබියදී, කඩිමුඩියේ වාහන ගෙන්වීම පිළිබඳව සමඟි ජනබලවේගයේ දැඩි විරෝධය පලකරන බව එහි මහලේකම් පාර්ලිමේන්තු මන්ත්‍රී රංජිත් මද්දුම බණ්ඩාර මහතා පවසයි.

එම තීන්දුව  වහාම අත්හිටුවා, එම මුදල් කොරෝනා මර්ධනය ඇතුලු ජනතා සුබවාදී කටයුතු වෙනුවෙන් යොදවන ලෙස  ආණ්ඩුවට බලකර සිටින බවත් මහ ලේකම්වරයා නිවේදනයක් නිකුත් කරමින් සඳහන් කරයි.
  
"තම ජනතා විරෝධී පිළිවෙත ආණ්ඩුව දිනෙන් දිනම ඔප්පු කරමින් සිටින අතර වගකිවයුතු විපක්ෂයක් ලෙස ආණ්ඩුවේ එවැනි කටයුතු ඉදිරියේ මුණිවත නොරකින බවට සහතික වෙමු.

වසර දෙකක් තිස්සේ රටේ සමස්ත ජනතාව පීඩාවෙන් පීඩාවට පත්ව ඇති අතර උදා වී ඇත්තේ ජනතාව පටි තද කරගන්නා මොහොත නොව,පාලකයින් පටි තදකරගතයුතු කාලය බව ආණ්ඩුවට නැවත සිහිපත් කරමු.

ආණ්ඩුව වහාම කළ යුත්තේ මනා කළමාණාකාරීත්වයකින් යුතුව ජනතාවාදී තීන්දු ගැනීම බවත්,ජනතාව උදෙසා ගනු ලබන තීන්දු වලට නූතනවාදී විපක්ෂයක් ලෙස කොන්දේසි විරහිතව සහය දෙන නමුත් ජනතා ද්‍රොහී කටයුතු වෙනුවෙන් අංශුමාත්‍රයක සහයක් අප ලබා නොදෙන බවත් ආණ්ඩුවට අවධාරණය කරමු" යැයිද එහි සදහන් වේ.