(හිරාන් ප්‍රියංකර ජයසිංහ)
 
වනාතවිල්ලුව එළුවන්කුලම ක්‍රොස්වේ සපත්තු පාලම යටින් හදිසියේ විශාල ජල කාන්දුවක් ඇතිවීමත් සම පුත්තලම මන්නාරම පැරණි මාර්ගයේ ගමනාගමන කටයුතු නැවත දැනුම් දෙන තුරු නවතා දැමූ බව වනාතවිල්ලුව ප්‍රාදේශීය ලේකම් චතුරක ජයසිංහ මහතා අද(10)  පැවසීය.
 
මෙම ජල කාන්දුව ඉකුත් 9 දින සවස ආරම්භ වී ඇත.
 
පසුව පුත්තලම නගරය ඇතුළු ප්‍රදේශ රැසකට පානිය ජලය ලබාදීමේ ව්‍යාපෘතියට ජලය ලබා ගැනීම සඳහා  වසර කිපයකට පෙර මෙම සපත්තු පාලම හරහා කලාඔය දිගේ ගඟේවාඩිය කලපු තිරයට ගලා ගිය ජලය හරස් කරන ලදී.
 
එම ජලය ලබා ගැනීමට ක්‍රොස්වේ සපත්තු පාලම දොරටු යොදා එය නවීකරණය කෙරිණි.
 
ඉහළ නිලධාරින් හා වාරි මාර්ග නිලධාරින් සමඟ සාකච්ඡා කිරීමෙන් පසු ඉදිරි ක්‍රියාමාර්ග ගන්නා බව ප්‍රාදේශීය ලේකම්වරයා කීය.
 
මේ හේතු නිසා විල්පත්තුව ජාතික වන උද්‍යානය මැදින් වු පුත්තලම එළුවන්කුම මාර්ගය ක්‍රොස්වේ නාවික හමුදා කඳවුර ආසන්නයෙන්  නැවත දැනුම් දෙනතුරු වසා දමන බව ප්‍රාදේශීය ලේකම්වරයා පැවසීය.
 
මෙම ස්ථානය නිරීක්ෂණය සඳහා පුත්තලම ප්‍රාදේශීය වාරි මාර්ග ඉංජිනේරු දිලීප හෙට්ටිආරච්චි මහතා ඇතුළු නිලධාරින් පිරිසක් ද එක්ව සිටියහ. මාර්ගය වසා දැමීමත් සමග මෙම මාර්ගයෙන් ගමන් කිරීමට පැමිණි බොහෝ පිරිසක් අපහසුතාවට ලක්වී ආපසු ගමන් කරන ආකාරයද දැක ගත හැකි විය.