(සුජිත් හේවාජුලිගේ )

ආර්ථික නිදහස පිළිබඳ දර්ශකයෙන් ශ්‍රී ලංකාව ලෝකයේ රටවල් අතර තවදුරටත් පහළට දමා ඇතැයි පේරාදෙණිය  විශ්ව විද්‍යාලයේ ආර්ථික විද්‍යා හා සංඛ්‍යාන අධ්‍යයන අංශයේ මහාචාර්ය වසන්ත අතුකෝරළ මහතා ලංකාදීපයට  පැවසීය.

ශ්‍රී ලංකාව පසුගිය වසරේදී ආර්ථික නිදහස පිළිබඳ දර්ශකය අනුව සිටියේ 136 වැනි ස්ථානයේය. එම ස්ථානය මේ වර්ෂය වනවිට 149 දක්වා ඉහළ ගොස් ඇතැයිද මහාචාර්යවරයා  කීවේය.

ලෝ ප්‍රකට හෙරිටේජ් ෆවුන්ඩේෂන් ආයතනය  රටවල් 184ක් යොදාගෙන මෙම ගණනය කිරීම කර ඇත.

ශ්‍රී ලංකාව ආර්ථික නිදහස පිළිබඳ දර්ශකය තුළ 2010 වර්ෂය වන විට සිටියේ 95 වැනි ස්ථානයේ බවත්  2020 වන විට එය  117 වැනි ස්ථානය  දක්වා ඉහළ ගිය බවත්  ඔහු කීවේය.

ආර්ථික නිදහස පිළිබඳ දර්ශකයෙන් ආසියානු පැසිපික්  කලාපයේ රටවල්  39 අතර  ශ්‍රී ලංකාව සිටින්නේ 34 වැනි තැන බවද   වසන්ත අතුකෝරල මහතා පැවසීය.

හෙරිටේජ් ෆවුන්ඩේෂන් ආයතනය නීතියේ ආධිපත්‍ය රජයේ ක්‍රියාකාරීත්වය නියාමන කාර්යක්ෂමතාව සහ  විවෘත වෙළදපොළ යන ප්‍රධාන විචල්‍යයන් හතරක් පදනම් කරගෙන  මෙම ගණනය කිරීම කර ඇත.

මෙම දර්ශකය අනූව  ඉන්දියාව  126 වැනි ස්ථානයේද නේපාලය 130 වැනි ස්ථානයේ ස්ථානයේද පකිස්ථානය 147 වැනි ස්ථානයේද පසුවන බව පැවසේ.

ස්විට්සර්ලන්තය සිංගප්පූරුව අයර්ලන්තය තායිවානය ලක්ෂෙම්බර්ග්  නවසීලන්තය ආර්ථික නිදහස ඉහළින්ම ඇති රටවල් ලෙස  එම ආයතනය හඳුන්වා දී ඇත.

දේශීය ආයෝජනය ශක්තිමත් නොවීම සහ  විදේශීය ආයෝජකයන් සැලකිය යුතු පරිදි රට තුළට නොඒම වැනි කාරණාද  ශ්‍රී ලංකාව මෙම දර්ශකයෙන් පහළ යෑමට ප්‍රධාන වශයෙන් තුඩුදී ඇතැයි සඳහන්වේ.