(තිලකරත්න දිසානායක)

ගම්පහ දිස්ත්‍රික් මහ රෝහලේ නේවාසික ප්‍රතිකාර ලබන සියලු කොරෝනා රොගීන්ට පස් මාසයක් තිස්සේ‍ දිවා ආහාරය ලබාදීමට කටයුතු කරන යතිවරයාණන් වහන්සේ නමක්  මිනුවන්ගොඩින් අපට හමුවිය.

ඒ මිනුවන්ගොඩ,බොරගොඩවත්තේ සම්මාජීව බෞද්ධ ආශ්‍රමාධිපති මොරාවත්තේ සුබෝධි හිමියන්ය.

දෙස් විදෙස් හිතවත් පරිත්‍යාගශීලීන්ගේ මූල්‍ය ආධාර යටතේ දිනකට රුපියල් 50,000 කට වැඩි මුදලක් වැය කරමින් උන්වහන්සේ මෙම සුවිශේෂී සද්කාර්යය සිදු කරනු ලබන බව ගම්පහ රෝහලේ අධ්‍යක්ෂවරයා පැවසීය.

මිනුවන්ගොඩ , බොරගොඩවත්තේ පිහිටි ආශ්‍රයේදී , සුධෝධි හිමියන්ගේ පූර්ණ සුපරික්ෂාව යටතේ ආහාර පිසීම සිදු කරමින් පසුගිය වෙසක් පෝය දිනයේ සිට අඛණ්ඩව මේ වන විට මාස පහක කාලයක් සියලුම කොරෝනා රෝගීන් වෙනුවෙන් දිවා ආහාරය ලබාදීම සිදු කරන අතර තරුණ දායක කණ්ඩායමක්  සුධෝධි හිමියන් සිදු කරනු ලබන මෙම සද්කාර්යයට සහාය දක්වති.

ඒ අනුව මේ වන විට මාස පහක කාලයක් අඛණ්ඩව දිවා ආහාරය පිළියෙල කොට ලබාදීම සුබෝධි හිමියන්  සිදු කරන අතර විශේෂඥ වෛද්‍ය ඉසුරු අබේවර්ධන මහතා ඇතුලු වෛද්‍යවරුන් පිරිසකගේ සහ දෙස් විදෙස් පරිත්‍යාගශීලීන්ගේ මූල්‍ය දායකත්වයෙන්, කොරෝනා රෝගීන් වෙනුවෙන් අඛණ්ඩව උදෑසන ආහාරය ලබා දීමද සිදු කරති.