(අංජුල මහික වීරරත්න)

මෙරට ජාත්‍යන්තර ගුවන් තොටුපොළවල් ප්‍රවර්ධනය කිරීම සඳහා දිරි ගැන්වීම් ප්‍රදානය කිරීමට කැබිනට් අනුමැතිය ලැබී තිබේ.

යාපනය ජාත්‍යන්තර ගුවන්තොටු පොළ, කොළඹ ජාත්‍යන්තර ගුවන්තොටු පොළ (රත්මලාන) සහ මත්තල රාජපක්ෂ ජාත්‍යන්තර ගුවන්තොටු පොළ සඳහා ජාත්‍යන්තර ගුවන් සේවා ආකර්ෂණය කර ගැනීමේ අරමුණින් සීමාසහිත ගුවන්තොටුපොළ හා ගුවන් සේවා (ශ්‍රී ලංකා) (පුද්ගලික) සමාගම විසින් ජාත්‍යන්තර ගුවන් සේවා සඳහා දිරිගැන්වීමේ සහන යෝජනා ක්‍රම හඳුන්වා දී තිබේ. 

ඒ යටතේ එම ගුවන්තොටුපොළවල් සඳහා අපගමන බද්දට අදාළව සලසා ඇති සහන තවදුරටත් පහත සඳහන් පරිදි දීර්ඝ කිරීම පිණිස ප්‍රවාහන, මහා මාර්ග, වරාය සහ සිවිල් ගුවන් සේවා අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

* යාපනය ජාත්‍යන්තර ගුවන්තොටුපොළ වෙත නිශ්චිත කාලසටහන්ගත ගමන් වාර ක්‍රියාත්මක කෙරෙන ගුවන් සේවා සඳහා දැනට ක්‍රියාත්මක වන අපගමන බද්දෙන් 50%ක ගාස්තු අත් හැරීමේ සහනය 2026-01-30 දින දක්වා දීර්ඝ කිරීම.

* කොළඹ ජාත්‍යන්තර ගුවන්තොටු පොළ (රත්මලාන) වෙත නිශ්චිත කාලසටහන්ගත ගමන් වාර ක්‍රියාත්මක කෙරෙන ගුවන් සේවා සඳහා දැනට ක්‍රියාත්මක වන අපගමන බද්දෙන් 50%ක ගාස්තු අත්හැරීමේ සහනය 2025-03-27 දින සිට වසරක කාලයක් දක්වා දීර්ඝ කිරීම.

* මත්තල රාජපක්ෂ ජාත්‍යන්තර ගුවන්තොටු පොළ වෙත නිශ්චිත කාලසටහන් ගත ගමන් වාර ක්‍රියාත්මක කෙරෙන ගුවන් සේවා සඳහා දැනට ක්‍රියාත්මක වන අපගමන බද්දට අදාළ පූර්ණ සහනය 2024-12-29 දින සිට තවත් වර්ෂයක කාලයක් දක්වා දීර්ඝ කිරීම.