රටවල් 18 ක සහභාගීත්වයෙන් කොළඹ ගලදාරී හෝටලයේදී පැවැත්වෙන 6 වැනි ලෝක කැරම් ශූරතාවලියේ කණ්ඩායම් ඉසව්වේ කාන්තා අනුශූරතාව දිනා ගැනීමට ශ්‍රී ලංකා ක‍්‍රීඩිකාවෝ සමත්වුහ. කණ්ඩායම් අවසන් මහා තරගයේදී ශ්‍රී ලංකාව තරග 3/0 කින් පරාජය කළ ඉන්දියාව නැවතත් ලෝක කැරම් කාන්තා ශූරතාව රැක ගත්තේය. අවසන් වරට 2008 වසරේ ප‍්‍රංශයේ පැවැති ලෝක කැරම් තරගාවලියේද ඉන්දියාව කාන්තා ශූරතාව දිනාගත් අතර ශ්‍රී ලංකාවට අනුශූරතාව හිමිවිය. ශ්‍රී ලංකා පිලේ නායිකා ජෝශප් රොෂිටා, යශිකා රාහුබද්ධ සහ මධුෂිකා කාංචනමාලා තරග තුනට සහභාගි වු අතර රශ්මි කුමාරී, අයි. ඉලබාෂාගී සහ කවීතා සෝමන්චි ජයග‍්‍රාහී ඉන්දිය පිලට ඇතුළත්වුහ. ජපානය, මැලේසියාව සහ මාලදිවයින මුලික වටයේදී පරාජය කරමින් ශ්‍රී ලංකා ක‍්‍රීඩිකාවෝ අවසන් මහා තරගයට සුදුසුකම් ලැබුහ.