තහනම් උත්තේජක චෝදනාවට ලක්වූ ලාබාල කෙටි ධාවන ශූරයෙකු වන හිමාෂ ඒෂාන්ගේ පුහුණුකරුට එරෙහිවද දැඩි පියවර ගත යුතු යයි අද (7) පැවැත්වෙන ශ්‍රී ලංකා මලල ක‍්‍රීඩා සංගමයේ විධායක සභා රැුස්වීමට යෝජනාවක් ඉදිරිපත් කිරීමට නියමිතව ඇතැයි වාර්තාවේ. මලල ක‍්‍රීඩා සංගමයේ විධායක සභා රැස්වීම අද පස්වරු 2.30 ට ටොරින්ටන් පෙදෙසේ ක‍්‍රීඩා අමාත්‍යංශ නේවාසිකාගාර ගොඩනැගිල්ලේ ස්ථාපිත මලල ක‍්‍රීඩා සංගම් නව මූලස්ථානයේදී පැවැත්වේ. ජාතික මලල ක‍්‍රීඩා ශූරතාවලියේදී මීටර් 100 (පිරිමි) ඉසව්ව තත්ත්පර 10.50 ට ජයගත් හිමාෂ 18 හැවිරිදි පාසල් සිසුවෙකි. තහනම් උත්තේජකයක් වන මෙතිල්හෙක්සමින්  (Methylhexaneamine) ඔහුගේ ශරීර ගත වී තිබූ බවට ඔහුට චෝදනා එල්ල වී තිබේ. ජාතික මලල ක‍්‍රීඩා ශූරතාවලියේදී ක‍්‍රීඩක ක‍්‍රීඩිකාවන් හය දෙනකුගේ මුත‍්‍ර නියැදි අහඹු ලෙස ලබාගැනීමට කටයුතු කළ බව ජාතික ක‍්‍රීඩා වෛද්‍ය ඒකකයේ සභාපති මහාචාර්ය අර්ජුන් ද සිල්වා මහතා පවසයි. මේ වනවිට තහනම් උත්තේජක ගැනීමේ චෝදනාවට ලක්වූ ශී‍්‍ර ලංකා මලල ක‍්‍රීඩක ක‍්‍රීඩිකාවන් ගණන 14ක් දක්වා ඉහළ ගොස් තිබේ. පෞද්ගලික ඖෂධ වෙළෙඳසලකින් මිලදී ගත් ශක්ති වර්ධන පානයක් තමා පාවිච්චි කළ බව චෝදනාලාභී ක‍්‍රීඩකයා ප‍්‍රකාශ කර තිබේ. තරග වැදීමකට ආසන්නව පිටියදී එය භාවිතා නොකරන ලෙස අසුරණයේ දක්වා තිබියදීත් අදාළ කී‍්‍රඩකයා එය පාවිච්චි කර තිබේ නම් එහි වගකීම පුහුණුකරුවාත් බාර ගත යුතු බවට මේ සම්බන්ධයෙන් මලල ක‍්‍රීඩා සංගමයට යෝජනා ඉදිරිපත් වනු ඇතැයිද වාර්තාවේ. "ලංකාදීප”ය කළ විමසුමකට පිළිතුරු දුන් මහාචාර්ය අර්ජුන් ද සිල්වා මහතා මෙම මලල ක‍්‍රීඩකයාට එරෙහිව එල්ල වී තිබෙන තහනම් උත්තේජන චෝදනාව සම්බන්ධයෙන් අවසන් නිර්දේශ ඉදිරිපත් කරන්නේ විනය කමිටුව බව පැවසීය. මෙම සිද්ධිය ගැන ක‍්‍රීඩා වෛද්‍ය ඒකකය ලංකාදීපයට පැවසුවේ නොදැනුවත්කම සමාවක් දීමට හේතුවක් නොවන බවය. එහෙත් මෙම සිද්ධියේ ස්වභාවය දෙස බැලීමේදී ක‍්‍රීඩකයාට දඬුවම් පැමිණවීමේදී ලිහිල් පිළිවෙතක් සම්බන්ධයෙන් අවධානය යොමු කළ හැකි බවද ඔහු වැඩිදුරටත් පැවසීය.