අධිකරණය ගැන ජනතා සැලැකිල්ල අඩුවේගන යන බව පෙනෙතියි යහ පාලනය පිළිබඳ ජ්‍යෙෂ්ඨ අමැති රත්නසිරි වික්‍රමනායක මහා හොරණදී ප්‍රකාශ කළේය.

අධිකරණය තීන්දු ක්‍රියාත්මක කිරීමට බැරි තත්ත්වයක් උදා වන විටත් දෙන්නා වූ තීන්දු බල රහිත වන විටත් ජනතාව කලකිරෙන බව ද මේ ආයතන එපා වන බව ද ඔහු කීවේය.

‘අද විශාල අර්බුදයක් ඇති වී තිබෙනවා. විධායකය, විවස්ථාදායකය හා අධිකරණය ජනතාවට පෙනන ආකාරයට විශාල ගැටුමක්. ජනතාවගේ සැළකිල්ල  අධිකරණය ගැන අඩුවී ගෙන යන බව පේනවා. අධිකරණයට තීන්දු ක්‍රියාත්මක කිරීමට බැරි තත්ත්වයක් උදා වන විට දෙන්නා වූ තීන්දු අනුව තීන්දු බල රහිත වන විට ජනතාව කලකිරෙනවා. ජනතාවට මේ ආයතන එපා වෙනවා. මේවායින් අපි වැළකිය යුතුයි. අප දැනගෙන වැඩ කළ යුතුයි.

අපි කවුරුත් පරිත්‍යාගශීලී විය යුතුයි. අපි හරි නිවැරදියයි හයියෙන් කියා වැඩක් නැහැ. කා සමගත් සහෝදරත්වයෙන් වැඩ කරන්න ඉගෙනගත යුතුයි. ආයතනත් පුද්ගලයනුත් එසේ විය යුතුයි. ආයතන තුනක් ගැන මම කිව්වා. ඒ ආයතන තුන සහයෝගයෙන් වැඩ කළ යුතුයි. අන්‍යෝන්‍ය හැගීම් වර්ධනය කරගත යුතුයි. එක ආයතනයක් පාගාගෙන තව ආයතනයක් ඉස්සෙන්නට බැහැ. ජනමතය නියෝජනය වෙන්නේ කොතනද එතනට ගරු කළ යුතුයි.

මේ ආරවුල් ඇතිවෙලා තිබෙන්නේ ඒ ආකාරයේ හැඟීම් නැති නිසයි.