නිවුන් දරුවකු කුසේදී මියගිය පසු අනෙක් දරුවා මව් කුසයේ නිරෝගීව වැඩෙන්නට සලස්වා ස්වාභාවිකව ප්‍රසූත කිරීමට සැලැස් වූ ලොව දුර්ලභ දරු උපතක් සිදු කිරීමට අනුරාධපුර ශික්ෂණ රෝහලේ විශේෂඥ වෛද්‍ය අසේල අමරසිරි හා කාර්ය මණ්ඩලය සමත් වෙයි.

සාමාන්‍යයෙන් මෙවැනි දරු උපතකදී එක් දරුවෙකු මිය ගිය විට අනෙක් දරුවා ද ඒ වෙලාවේම බිහිවීම හෝ කුසේ මිය යන නමුත් මෙම ප්‍රසූතිය විශේෂත්වය වන්නේ 24 වැනි සතියේ දී පළමු දරුවා ගබ්සා වීමෙන් පසු වැදෑමහ කොටස හා සම්බන්ධ වී තිබූ නාභිරජ්පුව මැදින් කපා ගැබ්ගෙලට මැහුම් ද නොදමා කලලය ආරක්ෂා කරගැනීමට වෛද්‍යවරු කටයුතු කළහ.

මෙම සැත්කම  මවගේ ජීවිතයටත් දරුවාගේ ජීවිතයටත් දැඩි අවදානම් වූවත්   මෙම වෛද්‍ය විශේෂඥවරයා ප්‍රතිජීවක ලබාදී විෂබීජ පැතිරීම වලක්වා පැර‚ වැදෑමහ කොටස ක්ෂය වී යන තුරුද කලලය වැඩි සති 36කින් සාමාන්‍ය දරු ප්‍රසූතිය වන තුරුද මවට අවශය ප්‍රතිකාර ලබාදී තිබේ.

මැදවච්චිය ද ඹුගල පදිංචි කේ.ජී. නිල්මි‚ මහත්මිය (29) දෙවැනි දරුවා නීරෝගිලෙස ප්‍රසූත කළාය.  මවත් දරුවාත් දෙදෙනා නීරෝගීව සිටින බව රෝහල් අධ්‍යක්ෂ වෛද්‍ය විජේදාස අතපත්තු මහතා පවසයි.

‘මම සතුටින් ඉන්නේ පළමු බබාට වයස අවුරුදු 4 1/2යි. මම ලොකු අවදානමකින් ජීවිතය බේරා ගත්තා. බබාද හොඳින් යැයි‘ මව පැවැසුවාය.
විශේෂඥ වෛදය අසේල අමරසිරි මහතා පැවැසුවේ මෙවැනි උපත් විශ්මය ජනක ජනක ඒවා බවට මීට පෙර පුවත්පත්වල පල වූ නමුත් තමන් අවදානමක් ගෙන සිසේරියන් සැත්කමක්ද නොකර සාර්ථක දරු උපතකට ප්‍රතිකාර කළ බවය.
‘මෙහි විශේෂත්වය තමා, රජ්ජුව කොටස කලල දෙකේ වෙන වෙනම දිගට තිබූ අතර බිහිවූ දරුවාගේ නාභි රජ්ජුව එළියට ඒම. මෙය දුර්ලභ අවස්ථාවක් වුනේ ඒ නිසා යැයි‘ වෛද්‍ය වරයා කීය.