(සුජිත් හේවාජුලිගේ )

සැර කොරෝනා වයිරස  සෙවීමේ තවත් පරීක්ෂණ මාලාවක් හෙට  (14) යළි අරඹන බව ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨයේ ආසාත්මිකතා, ප්‍රතිශක්තිවේද සහ සෛල ජෛව විද්‍යා අධ්‍යයන අංශයේ ප්‍රධානී ආචාර්ය චන්දිම ජීවන්දර මහතා  පැවැසීය .

දිවයිනේ විවිධ ප්‍රදේශවල කොරෝනා ආසාදිතයන්ගෙන්  ලබාගත් ජෛව පටල සාම්පල 16ක්  මේ යටතේ පරීක්ෂාවට ලක් කෙරෙන බවද  එම පරීක්ෂණවල ප්‍රතිඵල ලබන 18 වැනිදා සිකුරාදා වනවිට නිකුත් කිරීමට හැකිවනු ඇති බව ද   ඔහු සඳහන් කළේය.

ජෛව පටල   සාම්පල ලැබෙන ලැබෙන පරිදි  ඡාන අනුක්‍රමණ පරීක්ෂණවලට ඉදිරියේදී  යොමු කරන බව  චන්දිම ජීවන්දර  මහතා  වැඩිදුරටත් කීවේය.

මේ අතර සැර කොරෝනා වයිරස ප්‍රභේද සෙවීමේ පරීක්ෂණ දෙගුණයකින් පමණ වැඩි කිරීමට ශ්‍රී ජයවර්ධනපුර විශ්ව විද්‍යාලයේ වෛද්‍ය පීඨය තීරණය කර ඇත.

බ්‍රිතාන්‍යයේ  පැතිර ඇති ඇල්ෆා  සැර කොරෝනා වයිරස  ප්‍රභේදය දිවයිනේ තවත්  ප්‍රදේශ 10 කින්ද ඉන්දීය ඩෙල්ටා සැර  කොරෝනා වයිරස ප්‍රභේදය  නිරෝධායන මධ්‍යස්ථාන දෙකකින්ද  පසුගිය දිනවල සොයා ගන්නා ලදී .

මෙම සොයාගැනීම කරනු ලැබුවේද ආචාර්ය චන්දිම ජීවන්දර මහතා  ඇතුළු  පර්යේෂකයන් කණ්ඩායමක් විසිනි.