( පැතුම් දර්ශන)

හොරොව්පොතාන  මොරවැව ප්‍රදේශයේ හේනක නවතා තිබූ රෝද හතරේ ට්‍රැක්ටරයක රියදුරු අසුනේ වාඩිවී සිටි දාහතර හැවිරිදි සිසුවකු ගේ හිස මතට ඒ ආසන්නයේ ගිනි ගනිමින් තිබූ කෝන් ගසක් අද (16) දහවල් කඩා වැටීමෙන් බරපතළ තුවාල ලැබූ සිසුවා හොරොව්පොතාන රෝහලට ඇතුළත් කිරීමෙන් පසු මියගොස් ඇතැයි හොරොව්පොතාන පොලීසිය කියයි.

මෙලෙස මියගොස් ඇත්තේ හොරොව්පොතාන දුටුවව ප්‍රදේශයේ පදිංචි, දුටුවැව මහා විද්‍යාලයේ නව වන ශ්‍රේණියේ ඉගෙනුම ලබමින් සිටි සුන්දර සේනගේ චම්පික සුන්දර සේන නැමැති සිසුවෙකි.

මියගිය සිසුවා සිය ඥාති සොහොයුරෙකු ගේ ට්‍රැක්ටරයක නැගී අද (16) උදෑසන මොරවැව හේන් යායට පැමිණ ඇත්තේ සී සාන ආයුරු බලා සිටීමට බව පොලිසිය කියයි. ඔවුන් සමඟ තවත් ට්‍රැක්ටරයක් ද ඒ මොහොතේ එම හේන් යායේම සීසාමින් තිබී ඇති අතර එම ට්‍රැක්ටරයෙ කාර්මික දෝෂයක් හටගෙන තිබිණි.

පසුව මියගිය සිසුවා ගේ ඥාති සොහොයුරා ද තම ට්‍රැක්ටරය අසල තිබූ කෝන් ගසක් ලග නවතා කාර්මික දෝෂය ඇති වූ ට්‍රැක්ටරය පරික්ෂා කිරීමට ගොස් ඇති බවත් ඒ මොහොතේ මියගිය සිසුවා ඥාති සොහොයුරා පැදවූ ට්‍රැක්ටරයෙ රියදුරු අසුනට නැග වාඩි වී සිට ඇති බවත් පරීක්ෂණ පවත්වන පොලිසිය  කියයි. පොලිසිය වැඩිදුරටත් පවසන්නේ ඒ අවස්ථාවේදී ට්‍රැක්ටරය ආසන්නයේ තිබු දින ගණනක් ගිනිගෙන වැටීමට ආසන්නව තිබූ කෝන් ගස සිසුවා ගේ හිස මතට වැටී ඇති බවය.

අනතුරෙන් බරපතල තුවාල ලැබූ සිසුවා සුවසැරිය ගිලන් රථයකින්  රෝහලට පිටත් කිරීමට ඒ මොහොතේ එම ස්ථානයේ සිටි පිරිස කටයුතු කර තිබුණත් පසුව ඔහු මිය ගොස් තිබුණි