(ඩයනා උදයංගනී)

ආණ්ඩුව මේ අවස්ථාවේ ඔලුව පාවිච්චි කර වැඩනොකළොත් ශ්‍රී ලංකාවට චීනයත් නැතිවන බව ශ්‍රී ලංකා නිදහස් පක්‍ෂයේ සභාපති, හිටපු ජනාධිපති මෛත්‍රීපාල සිරිසේන මහතා පැවසීය.

ශ්‍රී ලංකාවේ අවසරය මත චීනයේ සිට හම්බන්තොට වරාය දක්වා පැමිණීමට නියමිතව තිබූ යුවාන් වැන්ග් 5 නෞකාව සම්බන්ධයෙන් ඇතිවී ඇති ගැටලුකාරී තත්වය රටට අහිතකර හා පාඩු නොවන ලෙස ආණ්ඩුව විසඳාගනු ඇතැයි විශ්වාස කරන බව හිටපු ජනාධිපතිවරයා සඳහන් කළේය.

තම රජයෙන් පසු බලයට පැමිණි රජය ද ජපානය ශ්‍රී ලංකාවෙන් ඈත් වූ බව කී හිටපු ජනාධිපතිවරයා මෙය රටේ විදේශ ප්‍රතිපත්තියේ වරදක් බවත් ශ්‍රී ලංකාවට ලොව සෑම රටක්ම වැදගත් බවත් කීවේය.

වත්මන් විදේශ කටයුතු ඇමති අලි සබි්‍ර මහතා ඉතා හොඳ මානවවාදී උගත් අයෙක් වුවත් අමාත්‍යාංශ නිලධාරීන් මෙම නෞකාවට අවසර දී ඇත්තේ අමාත්‍යවරයාගේ අවසරය හෝ නොමැතිව බව දැනගන්නට ඇතැයි ද මෛත්‍රීපාල සිරිසේන මහතා කීවේය.

මෛත්‍රීපාල සිරිසේන මහතා මේ බව පැවසුවේ එම පක්‍ෂ මාධ්‍ය මධ්‍යස්ථානය විවෘත කිරීමේ අවස්ථාවට එක්වෙමිනි.

වර්තමානයේ දී නව තාක්‍ෂණය සමඟ මාධ්‍ය ඉතා බලවත් වී ඇතැයි කී හිටපු ජනාධිපතිවරයා අතේ සතයක් නොමැතිව රාජපක්‍ෂ ආණ්ඩුවෙන් එළියට ආ ගමන්ව ජනාධිපතිධූරයට ගෙනආවොත්, අන්තිම කාලයේදී තමන් නැත්තට නැති කළේත් සමාජ මාධ්‍ය බව ද පැවසීය.

තරුණයින් නායකත්වය ගත් අරගලයට ලක්‍ෂ ගණනාවක් එකතුකළේත්, රටේ පාලකයා රටෙන් පිටකිරීමට තරම් ශක්තියක් ගොඩනැගුවේත් ජංගම දුරකතනයෙන් බව ද හෙතෙම කීවේය.

ආණ්ඩුව කොයිතරම් හොඳ වුණත් ජනතාවට එය නරක් කර පෙන්වන්නත්, ආණ්ඩුව කොයිතරම් නරක් වුණත් හොඳම ආණ්ඩුව කරලා පෙන්වන්නත් මාධ්‍යයට හැකි බව ද සිරිසේන මහතා පැවසීය.