(සුජිත් හේවාජුලිගේ සහ  නිමන්ති රණසිංහ)

කොළඹ රිජ්වේ ආර්යා ළමා රෝහලේ ඩෙංගු රෝගී දරුවන් සංඛ්‍යාව 25 දක්වා ඉහළ නැග ඇතැයි ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා  පැවැසීය.

ඩෙංගු රක්තපාත තත්වය නිසා මින්  දරුවන් හත් දෙනකුගේ තත්වය බරපතළ බවද  ඔහු සඳහන් කළේය.

මේ අතර කොවිඩ්  රෝගී දරුවන් සංඛ්‍යාවද 11 ක් දක්වා ඉහළ නැග ඇති බව පැවසූ විශේෂඥ වෛද්‍යවරයා ඉන් නව දෙනකු සාමාන්‍ය වාට්ටුවල ප්‍රතිකාර ලබද්දී දෙදෙනකු දැඩි සත්කාර ඒකකයේ ප්‍රතිකාර ලබන  බවද ප්‍රකාශ කළේය.

ඩෙංගු  රෝගය වැළඳුණු දරුවන්ට හැකිතාක් දියර ආහාර ලබා දී විවේකයෙන් කාලය ගත කිරීමට අවස්ථාව සලසා දී  පැරසිටමෝල් මාත්‍රාවක් ලබා දෙන ලෙස දීපාල් පෙරේරා මහතා මවුපියන්ගෙන් ඉල්ලීමක් කළේය.

සමාජයේ කොවිඩ්  රෝගීන්ගේ වැඩිවීමක්  තිබිය හැකි වුවත් කොවිඩ්  පරීක්ෂණවලට යොමුවීමේ  මදකම නිසා රෝගීන් සංඛ්‍යාව නිසියාකාරව පෙන්නුම් නොකෙරෙන තත්වයක් ඇතැයි  හෙතෙම වැඩිදුරටත් පැවැසීය.