(මනෝප්‍රිය ගුණසේකර)

 

හිටපු මුදල් අමාත්‍ය රවී කරුණානායක මහතා සහ පවුලේ ඥාතීන් පදිංචිව සිටින බව කියන කොල්ලුපිටියේ ‘මොනෑක්’ නිවාස සංකීර්ණයේ රුපියල් කෝටියකට වඩා වටිනා නිවසක් ලබාගැනීම හා එම නිවස සඳහා මුදල් ගෙවීම සම්බන්ධයෙන් රවී කරුණානායක මහතාට සහ පර්පචුවල් ට්‍රෙෂරීස් සමාගමේ අධ්‍යක්‍ෂ අර්ජුන් ඇලෝසියස් මහතාට ලබන නෙවැම්බර් 18 වැනිදා අධිකරණ පෙනී සිටින ලෙස නියම කරමින් කොළඹ මහාධිකරණ විනිසුරු ආදිත්‍ය පටබැඳි මහතා අද (12) සිතාසි නිකුත් කළේය.

 

රජයේ සේවකයකු වන මුදල් අමාත්‍යවරයා වශයෙන් කටයුතු කරමින් පර්පචුවල් ට්‍රෙෂරීස් සමාගමෙන් මුදල් ගෙවු කොල්ලුපිටියේ ‘මොනෑක්’ නිවාස සංකීර්ණයේ නිවසක් ලබාගැනමෙන් රවී කරුණානායක මහතාද එම නිවස ලබාගැනීම සඳහා ආධාර අනුබල දීමෙන් අර්ජුන් ඇලෝසියස් මහතාද අල්ලස් පනත යටතේ දඬුවම් ලැබිය යුතු වැරදි සිදුකර ඇතැයි සඳහන් කරමින් අල්ලස් හෝ දුෂණ චෝදනා විමර්ශන කොමිසම විත්තිකරුවන්ට එරෙහිව අධිචෝදනා 06ක් යටතේ පවරා ඇති නඩුවේ අධිචෝදනා පත්‍ර බාරදීම සඳහා විත්තිකරුවන් මෙලෙස මහාධිකරණයට කැඳවා ඇත.

 

මෙම නඩුවේ පළමු විත්තිකරු වශයෙන් බත්තරමුල්ල රජමල්වත්ත පාරේ පදිංචි සන්දේශ් රවීන්ද්‍ර කරුණායක මහතාද දෙවැනි විත්තිකරු වශයෙන් පර්පචුවෙල් ට්‍රෙෂරීස් සමාගමේ හා වෝලට් ඇන්ඩ්රෝ ඇෂෝෂියේට් සමාගමේ අධ්‍යක්‍ෂවරයකු වන කොළඹ 07 මල්පාරේ පදිංචි අර්ජුන් ජෝශප් ඇලෝසියස් මහතාද නම් කර ඇත.

 

2016 පෙබරවාරී මස 16 වැනිදාත් 2016 සැප්තැමිබර් මස 30 වැනිදාත් අතර කාලයේදී රජයේ සේවකයකු වන මුදල් අමාත්‍යවරයා වශයෙන් කටයුතු කරමින් දෙවැනි ව්ත්තිකාර අර්ජුන් ඇලෝසියස් මහතා අධ්‍යක්‍ෂධුර දරණ පර්පචුවල් ට්‍රෙෂරීස් සමාගමේ හා වෝලට් ඇන්ඩ් රෝ ඇෂෝෂියේට් සමාගමේ චෙක්පත් මඟින් රුපියල් ලක්‍ෂ 116 කට අධික මුදලක් යොදවා ලබාගත් ‘මොනෑක්’ නිවාස සංකීර්ණයේ 5 ඡග්‍යග 2 දරණ නිවසේ පදිංචිව සිටීම ඒ සඳහා පර්පචුවල් ට්‍රෙෂරීස් සමාගමේ හා වෝලට් ඇන්ඩ්‍ රෝ ඇෂෝෂියේට් සමාගමේ චෙක්පත් මඟින් මුදල් ගෙවීම ඇතුළු චෝදනා මත රවී කරුණායක මහතාට එරෙහිවද මේ සඳහා රවී කරුණායක මහතාට ආධාර හා අනුබල දුන් බවට අර්ජුන් ඇලෝසියස් මහතාට එරෙහිවද අල්ලස් කොමිසම විසින් නඩු පවරා ඇත.

චෝදනා 06ක් යටතේ පවරා ඇති මෙම නඩුවේ විත්තිකරුවන්ට එරෙහි චෝදනා ඔප්පු කිරීම සඳහා සාක්කිකරුවන් 58 දෙනෙකු කැඳවීමටද ලේඛන 32 ක් ඉදිරිපත් කිරීමටද බලාපොරොත්තු වන බව අල්ලස් කොමිසම අධිකරණයට දැනුම් දී ඇත.