(විමුක්ති එස් රුද්‍රිගු)

අහමදාබාද් ජාත්‍යන්තර ගුවන් තොටුපොළේදී අත්අඩංගුවට ගත් ක්‍රියාකාරී අයි.එස් ත්‍රස්තවාදීන් සිව් දෙනා මීගමුව සහ කොළඹ ප්‍රදේශවල පදිංචි ශ්‍රී ලාංකිකයන් බවත් ඔවුන් මරාගෙන මැරෙන ප්‍රහාරයකට සූදානමින් ඉන්දියාවට පැමිණ ඇති බවත් ප්‍රශ්න කිරීම් වලදී අනාවරණය වූ බව ගුජරාට් පොලිස් ප්‍රධානී විකාස් සාහේ මහතා ප්‍රකාශ කළේය.

අත්අඩංගුවට ගත් 33 හැවිරිදි නුස්රත් අහමඩ් ගානි මීගමුවේ පදිංචිකරුවෙකු බවත් 27 හැවිරිදි නෆ්රාන් නවුෆර්, 35 හැවිරිදි ෆාරිස් ෆාරුක් සහ 43 හැවිරිදි රස්ඩීන් අබ්දුල් රහීම් කොළඹ ප්‍රදේශයේ පදිංචිකරුවන් බවත් ඔහු පැවැසුවේය.

එසේම අහමඩ් ගානිට වලංගු පකිස්තාන වීසා බලපත්‍රයක් තිබූ බවද සාහේ මහතා සඳහන් කළේය.

ත්‍රස්තවාදීන් සතුව තිබූ ජංගම දුරකථන දෙකක්, ගමන්මලු සහ ගුවන් ගමන් බලපත්‍ර පොලිස් බාරයට ගත් බවත් එක් ගමන් මල්ලක තිබී අයි.එස් ත්‍රස්ත සංවිධානයේ කොඩියක් සොයාගත් බවත් පොලිස් ප්‍රධානියා ප්‍රකාශ කළේය.

ඔවුන් සතුව තිබී පොලිස් භාරයට ගත් ජංගම දුරකතන වලින් ලබාගත් ඡායාරූප, කෙටි පණිවුඩ සහ අනෙකුත් තොරතුරු වලින් ශ්‍රී ලාංකිකයන් සිව්දෙනා අයි.එස් සංවිධානයේ ක්‍රියාකාරී සාමාජිකයන් යැයි හෙළිවූ බව සාහේ මහතා පැවැසුවේය.

ත්‍රස්තවාදීන් සිව් දෙනාට කතා කළ හැකි එකම භාෂාව වූයේ දමිළ භාෂාව බවත් ඔවුන්ට හින්දි සහ ඉංග්‍රීසි බස තේරුම් ගැනීමට නොහැකි වූ බවත් පොලිස් ප්‍රධානියා ප්‍රකාශ කළේය.ඒ හේතුවෙන් ප්‍රශ්න කිරීම්වලදී භාෂා පරිවර්තකයකු යොදා ගැනීමට සිදුවූ බවද ඔහු පැවසුවේය.

ශ්‍රී ලාංකික ත්‍රස්තවාදීන් සිව්දෙනා ඔවුන්ගේ බාරකරු වූ පාකිස්තානයේ පදිංචි අබූ නැමැත්තාගෙන් උපදෙස් ලැබෙන තෙක් අහමදාබාද් ජාත්‍යන්තර ගුවන්තොටුපොළේ රැඳී සිට ඇති බවත් අබූ නමැත්තා ශ්‍රී ලංකාවේදී ත්‍රස්තවාදීන් සිව් දෙනාට ත්‍රස්තවාදී ක්‍රියාකාරකම්වල යෙදීම සඳහා රුපියල් ලක්ෂ හතර බැගින් ලබා දී ඇති බවත් ප්‍රශ්න කිරීම් වලදී අනාවරණය වූ බව සාහේ මහතා ප්‍රකාශ කළේය.

අබූ නැමැත්තා ශ්‍රී ලංකාවේ සිට පාකිස්තානයට පදිංචියට ගිය අයෙකු බවත් ශ්‍රී ලාංකිකයන් සිව් දෙනා පසුගිය පෙබරවාරි මාසයේදී සමාජ මාධ්‍ය ඔස්සේ අබූ නැමැත්තා හඳුනාගෙන ඇති බවත් ඔහු පැවැසුවේය. අබූ හඳුනාගැනීමෙන් පසුව අයි.එස් ත්‍රස්ත සංවිධානයේ නායක අබු බකර් අල් බැඩාඩිගේ අනුගාමිකයන් බවට පත් වී ඇති බවද සාහේ මහතා ප්‍රකාශ කළේය.

පොලිස් බාරයට ගත් ජංගම දුරකතන දෙකේ තිබී ඉන්දියාවේ විවිධ ස්ථානවල ඡායාරූප සහ වීඩියෝ දර්ශන ලැබුණු බවත් ඉන් ලැබුණු තොරතුරු මත වහාම ක්‍රියාත්මක වූ ත්‍රස්ත මර්දන ඒකකය නිශ්චිත ස්ථානයක් සෝදිසි කිරීමේදී පාකිස්තානයේ නිෂ්පාදිත පිස්තෝල තුනක් සහ පතොරම් තොගයක් සොයාගත් බවත් ඔහු පැවැසුවේය.

ගමන් මල්ලේ තිබී සොයා ගත් අයි.එස් ත්‍රස්ත සංවිධානයේ කොඩිය පිළිබඳ ත්‍රස්තවාදීන්ගෙන් ප්‍රශ්න කෙරූ අවස්ථාවේදී එම කොඩිය මරාගෙන මැරෙන ත්‍රස්ත ප්‍රහාරය එල්ල කරන අවස්ථාවේදී තමන් ළඟ තබාගන්නා ලෙස අයි.එස් සංවිධානයෙන් නියෝග ලැබුණු බව ඔවුන් ප්‍රකාශ කළේ යැයි පොලිස් ප්‍රධානියා සඳහන් කළේය.