(සුජිත් හේවාජුලිගේ සහ තංගල්ල ආරියදාස කොඩිතුවක්කු)

බෙලිඅත්ත නගරයේ   අවමඟුල් නිවෙසකින් කොවිඩ් රෝගීන් 6 දෙනෙකු හමු වී ඇති අතර  එම අවමගුලට ප්‍රදේශයේ  විශාල පිරිසක් සහභාගිවී ඇතැයි තොරතුරු හෙළිවීම නිසා  ආරක්ෂක පියවරක් ලෙස නගරයේ සියලු වෙළඳසැල්  හා පොදු වෙළෙඳපොළ  (12) මධ්‍යම රාත්‍රී 12 දක්වා වසා දැමීමට තීරණය කළ බව බෙලිඅත්ත ප්‍රාදේශීය සභාවේ සභාපති සිරිල් මුණසිංහ මහතා පවසයි.

මෙම අවමඟුලට සහභාගී වූ දික්වැල්ල ප්‍රදේශයේ පුද්ගලයකු ද කොවිඩ් ආසාදනයවීමෙන් මිය ගොස් ඇතැයි සභාපතිවරයා කීය .

මේ පිළිබඳ තොරතුරු හෙළි වීමෙන් පසු ප්‍රදේශයේ පිරිසක් පී.සි.ආර් පරීක්ෂණවලට යොමු කර ඇතැයි සෞඛ්‍ය නිලධාරීහු පවසති .

මේ අතර පවතින තත්වය යටතේ බෙලිඅත්තේ ප්‍රදේශ කිහිපයක් වසා දැමීමට කටයුතු කරන්නැයි ප්‍රාදේශීය සභා ප්‍රධානීන් සෞඛ්‍ය අංශවලින් ඉල්ලීමක් කර ඇත.

අවමඟුල් උත්සවයේ කිහිපදෙනකුට කොරෝනා වැළඳී ඇති බව දැනගෙන සිටියද එය සෙසු අයට වසන් කර තිබූ බව පෙනී යන්නේ යයි එම සෞඛ්‍ය නිලධාරීහු වැඩිදුරටත් සඳහන් කරති .