ඇමෙරිකා එක්සත් ජනපද රාජ්‍ය ලේකම් ඇන්තනී බ්ලින්කන් සහ රුසියානු විදේශ අමාත්‍ය සර්ගෙයි ලැව්රොව්  මුණගැසී පැය 24 ගත වීමට මත්තෙන්, ඩොලර් මිලියන 200 ක ඇමෙරිකානු යුධ ආධාරවල පළමු කොටස ලෙස, ටොන් 90 කට ආසන්න පතොරම් සහ අවි ආයුධ රැගත් ගුවන් යානයක් යුක්රේනයේ කිව් අගනුවර වෙත ළඟා වී තිබේ.

එස්තෝනියා, ලැට්වියා සහ ලිතුවේනියා රාජ්‍යයන් හි ආරක්ෂක අමාත්‍යවරුන් යුධ ටැංකි සහ ගුවන් යානා නාශක මිසයිල යුක්රේනය වෙත ලබා දීමට සුදානම් බවට නිකුත් කරන ලද ඒකාබද්ධ නිවේදනයත් සමග ඇමෙරිකානු යුද ආධාරවල පළමු ආධාර කොටස මෙසේ කිව් අගනුවර වෙත ළඟා විය.

127,000 ආසන්න රුසියානු හමුදා යුක්රේන දේශසීමා ආසන්නයේ ස්ථානගත සිටින අතර යුක්රේනයේ අසල්වැසියකු වන බෙලරුස් රාජ්‍යයේ ද රුසියානු යුද අභ්‍යාස සහ ක්‍රියාකාරකම් සිදු වෙමින් පවතී.

රුසියන් ජනාධිපති පුටින්, යුක්රේනය ආක්‍රමණය කිරීමේ අදහසක් නොමැති බව පැවසුවත් ප්‍රධාන ඉල්ලීම් කිහිපයක් ඇමෙරිකාව ඇතුළු නේටෝ සංවිධානයට ඉදිරිපත් කර ඇත.

කිසිම දිනක යුක්රේනයට නේටෝ සංවිධානයේ සාමාජිකත්වය ලබා නොදෙන බවට පොරොන්දුවක් සහ නේටෝ සංවිධානයේ මිත්‍ර හමුදා වල අවි ආයුධ රුසියානු දේශසීමා ආසන්නයේ ස්ථානගත නොකරන බවට සහතිකයක් අවශ්‍ය බවත් එම ප්‍රධාන ඉල්ලීම්වලට ඇතුළත්ය.

ඇමෙරිකා එක්සත් ජනපදය සහ එක්සත් රාජධානිය චෝදනා කර සිටින්නේ රුසියාවට හිතවාදී රූකඩ ජනාධිපතිවරයකු යුක්රේනයට පත් කර ගැනීමට රුසියාවට අවශ්‍ය වී ඇති බවය.

මේ අතර, රුසියානු හමුදාවේ සහාය ලබන යුක්රේනයේ සිටින යුධ උපක්‍රම සහ පුපුරන ද්‍රව්‍ය පිළිබඳ මනා පුහුණුව ලැබූ බෙදුම්වාදී ගරිල්ලන් කණ්ඩායමක්, යුක්රේන ධජය යටතේ යුක්රේන රුසියා දේශසීමාවේ ස්ථාන ගත වී සිටින බවත් ඔවුන් රුසියානු හමුදාවට පහර දී ඔවුන් යුද්ධයකට පොළොඹවා ගැනීමට උත්සාහ ගන්නා බවත් ඇමෙරිකන් බුද්ධි අංශ පවසයි.

මෙය ඉතාමත් පැරණි රුසියානු යුද උපක්‍රමයක් බවත් ප්‍රහාරය එල්ල වූ වහාම රුසියාව යුක්රේනය ආක්‍රමණය කරනු ඇතැයි ඇමෙරිකානු යුද ප්‍රධානීහු පෙන්වා දෙති.

ඇමෙරිකා ජනාධිපති ජෝ බයිඩ්න් පැවසුවේ ඇමෙරිකා හමුදා යුක්රේනයට යැවීමට කිසිඳු බලාපොරොත්තුවක් නැතත් රුසියාව යුක්රේන දේශ සීමා ආක්‍රමණය කළහොත් විශාල වන්දියක් ගෙවීමට සිදුවනු ඇති බවය.

මේ සම්බන්ධයෙන් අදහස් දක්වමින් ඇමෙරිකන් ජනාධිපති ජෝ බයිඩන් මෙසේ ද පැවැසීය.

‘‘පුටින් ජනාධිපතිවරයා හැමෝටම අනුමාන ඉදිරිපත් කරන්න දීලා නිහඩව බලා ඉන්නවා ඒත් කවුරුත් දන්නේ නැහැ පුටින් ජනාධිපතිවරයාගේ සැබෑ අදහස, චේතනාව, සැලැස්ම. මේක ඇමෙරිකාව සාකච්ඡා මේසෙට ගෙන්නලා තමන්ට ඕන දේ ලබාගන්න යෙදු උපක්‍රමයක්ද ? එසේත් නැත්නම් මෙය සැබෑවටම ආක්‍රමණයකට සුදානම් වීමක්ද ? අප කවුරුත් දන්නේ නෑ’’