(මුදිතා දයානන්ද)

ජනතා විමුක්ති පෙරමුණ සංවිධානය කළ කම්කරු දින රැළිය එහි නායක අනුර කුමාර දිසානායක මහතාගේ ප්‍රධානත්වයෙන් කොළඹ විහාරමහාදේවී උද්‍යානය ඉදිරිපිටදී අද සවස පැවැත්විණි.

මෙම රැළියට සමගාමීව ඔවුන් සංවිධානය කළ පෙළපාලිය බී.ආර්සී. පිටියේ සිට පස්වරු දෙකයි තිහට පමණ ආරම්භ විය.

පෙළපාලිය මුලින්ම ගමන් කරනු ලැබුවේ කොමියුනිස්ට් නායකයින් වූ මාක්ස්, එංගල්ස්, ලෙනින් හා ජනතා විමුක්ති පෙරමුණේ නිර්මාතෘ රෝහණ විජේවීර මහත්වරුන්ගේ විශාල ප්‍රමාණයේ ඡායාරූප රැගත් රථ පෙළකි.

ඉන්පසු ජනතා විමුක්ති පෙරමුණ බැනරය යටතේ එම පක්ෂ නායකයෝ ගමන් කළහ.

අන්තර් සමාගම් සේවක සංගමය ඇතුලු රාජ්‍ය හා පෞද්ගලික ආයතන නියෝජනය කරමින් ඒවායේ වෘත්තීය සමිති නියෝජිතයෝද ගමන් කරනු දක්නට ලැබිණ. අනතුරුව සමාජවාදී ශිෂ්‍ය සංගමය, කාන්තා සංගමය, කලා සංගමය, තරුණ සංගමය හා රටපුරා සෑම දිස්ත්‍රික්කයක්ම නියෝජනය කරමින් ජවිපෙ සාමාජික සාමාජිකාවෝ විශාල පිරිසක් පෙළපාලියට එක්ව සිටියහ.

එෆ් ආර් සේනානායක මාවතේ සිට එක පැත්තකින් නෙළුම් පොකුණ දක්වාත් අනෙක් පැත්තෙන් රෝහල් වටරවුම දක්වාත් මැයි දිනයට පැමිණි ජනතාවගෙන් පිරි ඉතිරි යනු දක්නට ලැබිණ.