2022 ජුනි මස 29 වන බදාදා
(විනීතා එම් ගමගේ / ඡායාරූප - රොමේෂ් ධනුෂ්ක සිල්වා)
ආසියාවේ ඉහළම රෝගී සත්කාර සේවා සපයන ළමා රෝහලක් සේ ප්‍රකට රිජ්වේ ආර්යා ළමා රෝහලේ පහසුකම් තවත් වැඩි දියුනු කරමින් හෘද උරස් ප්‍රතිකාර හා දැඩි සත්කාර රෝගී සේවා සංකීර්ණයකට ජනාධිපති මෛත්‍රීපාල සිරිසේන මහතා අතින් අද (2) පෙරවරුවේ මුල්ගල් තැබිණි.
රිජ්වේ ආර්යා ළමා රෝහල ඇඳන් 969 කින් යුත් තෘතියික සත්කාර සේවා සපයන රෝහලක් වන අතර එහි සියලුම වෛද්‍ය සහ ශල්‍ය වෛද්‍ය ප්‍රතිකාර කෙෂත්‍ර වලින් යුක්තය. ශ්‍රී ලංකාවේ වසරකට උපදින දරුවන් 380,000 දෙනාගෙන් 3000 ක් පමණ සංජානීය හෘද රෝග සහිතව උපදී.
එයින් 2500 ක් පමණ දෙනාට ප්‍රතිකාර අවශ්‍ය වේ. එහෙත් රිජ්වේ ආර්යා ළමා රෝහලේ දී මෙවැනි සැත්කම් කළ හැක්කේ 1600 ක් පමණි. එයින් 900 ක් හෘද සැත්කම් වේ. 700 ක් කැතීටකරණ සැත්කම් වේ.
නව ප්‍රතිකාර සේවා සංකීර්ණය ආරම්භ වීමත් සමඟ හෘද සැත්කම් 2000 ක් ද කැතිටකරණ සැත්කම් 900 ක් ද සිදුකළ හැකි වනු ඇත. නව ගොඩනැගිලි සංකීර්ණය ආරම්භ කිරිීමෙන් පසු සියලු සේවා එම ගොඩනැගිල්ල තුළ පවත්වාගෙන යාමේ අරමුණක් ද ඇතැයි පැවැසේ.
ශ්‍රී ලංකා ළමාරෝග විශේෂඥ වෛද්‍යවරුන්ගේ සංගමයට මෙම ගොඩනැගිල්ල ඉදිකිරීමේ මහත් උවමනාවක් තිබිණි. එහි සභාපති විශේෂඥ වෛද්‍ය ලක්කුමාර් ප්‍රනාන්දු මහතා ඇතුළු සාමාජිකත්වයේ සමඟ එක්ව පුංචි හදවත් ව්‍යාපෘතිය ඇරඹුනේ මේ වෙනුවෙනි. එයින් එකතු වූ ජනතා පරිත්‍යාග රුපියල් මිලියන 180 කි. රුපියල් මිලියන 2400 ක් වැයවෙතැයි ගණන් බලා ඇති මෙම ගොඩනැගිලි සංකීර්ණය සඳහා පරිත්‍යාග මුදල් හැර ඉතිරිය රජයෙන් වියදම් කරන සුදානමින් ඊට මුල් ගල් තැබිණි.
මේ අනුව රජය අනුමත ව්‍යාපෘතියක් ලෙස ආරම්භ වන මේ ගොඩනැගිල්ලේ බිම් මහළ හැරුණු විට තවත් මහල් 10 කි. මධ්‍යම ඉංජිනේරු උපදේශක කාර්යංශය මෙහි සැලසුම් නිර්මාණය වියදම් ගණනය ආදිය සිදුකරන අතර ඉදිකිරීම් සිදුවන්නේ නාවික හමුදාවෙනි.
නව ගොඩනැගිල්ලට මුල්ගල් තැබීමේ අවස්ථාවට සෞඛ්‍ය හා දේශිය වෛද්‍ය ඇමති රාජිත සේනාරත්න, නියෝජ්‍ය ඇමති ෆයසිල් කාසිම්, සෞඛ්‍ය අමාත්‍යංශයේ ලේකම් ජනක සුගතදාස, ළමා රෝහලේ අධ්‍යක්ෂ ඩබ්ලිව් කේ වික්‍රමසිංහ, ළමාරෝග පිළිබඳ විශේෂඥ වෛද්‍යවරුන්ගේ සංගමයේ සභාපති ලක්කුමාර් ප්‍රනාන්දු, යන මහත්වරු ඇතුළු පිරිසක් සහභාගි වූහ.
