(රංජන් කස්තුරි)

ඛණිජතෙල් වෘත්තීය සමිති එකමුතුවේ නියෝජිතයින් සහ ඛණිජ තෙල් සම්පත් සංවර්ධන අමාත්‍යංශයේ ලේකම් උපාලි මාරසිංහ මහතා අතර අද (25) පස්වරුවේ පැවති සාකච්ඡාව අසාර්ථක වී තිබේ.

සාකච්ඡාව අසාර්ථක වූ බැවින් වැඩ වර්ජනය තවදුරටත් අඛණ්ඩව සිදු කරන බව ඛණිජ තෙල් වෘත්තීය සමිති එකමුතුවේ මාධ්‍ය ප්‍රකාශක බන්දුල සමන් කුමාර මහතා ලංකාදීපයට පැවසීය.

වැඩවර්ජනය අතහැර ජනාධිපතිවරයා සමග සාකච්ඡා කිරීමට පැමිණෙන්නැයි අමාත්‍යංශ ලේකම්වරයා සහ ඛණිජතෙල් සංස්ථාවේ සභාපති ධම්මික රණතුංග මහතා යෝජනා කළ නමුත් ඛණිජ තෙල් වෘත්තිය සමිති නියෝජිතයින් එය එකහෙළාම ප්‍රතික්ෂේප කළ බවද ඔහු කීය.

වැඩවර්ජනය නතර කළ හැක්කේ ජනාධිපතිවරයා ලබාදෙන විසඳුම පිළිගත හැකිනම් පමණක් යැයි එහිදි වෘත්තීය සමිති නායකයින් අමාත්‍යංශ ලේකම්වරයාට සහ සභාපතිවරයාට දැන්වූ බවද මාධ්‍ය ප්‍රකාශක වරයා කීය.