(ඩයනා උදයංගනී)

මෙවර 5 ශ්‍රේණිය ශිෂ්‍යත්ව විභාගයට පෙනී සිටින දරුවන්ට සහනයක් ලබාදීමට තීරණය කර ඇතැයි අධ්‍යාපන, ක්‍රීඩා හා තරුණ කටයුතු අමාත්‍ය ඩලස් අලහප්පෙරුම මහතා පැවසීය.

ඒ අනුව ශිෂ්‍යත්ව විභාගයේ පළමු ප්‍රශ්න පත්‍රයට මෙතෙක් ලබා දී තිබූ විනාඩි 45ක කාලය පැයක් ලෙස අමතර විනාඩි 15කින් දීර්ඝ කිරීමටත්, දෙවැනි ප්‍රශ්න පත්‍රය සඳහා ලබා දෙන වරණ 4ක් සහිත බහුවරණ ප්‍රශ්න පත්‍රය වරණ 3ක් පමණක් සහිතව ලබාදීමටත් මෙවර කටයුතු කරන බව අමාත්‍යවරයා සඳහන් කළේය.

මෙමගින් සිසුදරුවන්ට නිවැරදි පිළිතුර තෝරාගැනීම පහසු වනු ඇතැයි ද ඇමතිවරයා කීවේය.

අමාත්‍යවරයා මේ බව පැවසුවේ අධ්‍යාපන අමාත්‍යාංශ ශ්‍රවණාගාරයේදී අද (29) පැවති අමාත්‍යාංශයේ නව වෙබ් අඩවිය විවෘත කිරීමේ අවස්ථාවට එක්වෙමිනි.

මෙවර ශිෂ්‍යත්ව විභාගය ලබන ඔක්තෝබර් 11 වැනි දින පැවැත්වීමට නියමිත අතර ඊට මුහුණ දෙන දරුවන්ගේ අධ්‍යයන කටයුතුවලට කොවිඞ් 19 තත්ත්වය හේතුවෙන් සිදුවූ බලපෑම හා පීඩනය කෙරෙහි සාධාරණ සහ මානුෂීය ලෙස අවධානය යොමු කරමින් මෙම තීරණය ගත් බවද ඩලස් අලහප්පෙරුම මහතා සඳහන් කළේය.