(කටුනායක ටී.කේ.ජී.කපිල )

නීතිවිරෝධී ලෙස ඩුබායි වෙත වල්ලපට්ටා තොගයක් රැගෙන යෑමට තැත් කළ ශ්‍රී ලාංකික ගුවන් මගියෙකු සිකුරාදා  රාත්‍රියේදී කටුනායක ගුවන් තොටුපොළේ දී රේගු නිලධාරීන් විසින් අත් අඩංගුවට ගත් බැව් සහකාර මාධ්‍ය ප්‍රකාශක විපුල මිනුවන්පිටිය මහතා ප්‍රකාශ කළේය .

 මොහු 38 හැවිරිදි කොළඹ ප්‍රදේශයේ පදිංචි ව්‍යාපාරිකයෙකි. ඔහු 3/16 දින රාත්‍රී 6.35 ට පමණ ඩුබායි බලා පිටත්ව යන ශ්‍රී ලන්කන් ගුවන් සේවයේ යූ.එල්. - 225 දරන ගුවන් යානයට කටුනායක ගුවන් තොටුපොළ වෙත පැමිණ තිබුණි .
ඔහු විසින් රැගෙන ආ ගමන් මල්ලේ රුපියල් 14,00,000 (දහ හතර ලක්ෂයක් ) පමණ වටිනා වල්ලපට්ටා කිලෝ ග්රෑම් 25 යි ග්රෑම් 400 ක් සගවා ගෙන තිබී සහකාර රේගු අධිකාරී මොහොමඩ් අම්‍රින් මහතා විසින් අත් අඩංගුවට ගෙන තිබුණි .
කටුනායක ගුවන් තොටුපොළ රේගු අධ්‍යක්ෂ ඕ.එම්.ජබීර් මහතාගේ අධීක්ෂණය යටතේ නියෝජ්‍ය රේගු අධ්‍යක්ෂ අචල චන්ද්‍රසේකර මහතා මේ පිළිබඳව වැඩිදුර රේගු පරීක්ෂණය පැවැත්වීය . එහිදී මෙම වල්ලපට්ටා තොගය රාජසන්තක කළ අතර , මේ පුද්ගලයාට රුපියල් ලක්ෂයක දඩ මුදලක් ගෙවන ලෙසද නියෝග කළේය .