(විනීතා ගමගේ)

උඩරට වතුකරයෙන්  වාර්තා වන පිළිකා රෝගීන් අතරින් අති බහුතරය  ගලනාලයේ පිළිකා වැළඳුණු රෝගීන් බව රෝහල්වල දත්ත විශ්ලේෂණය කිරීමෙන් පෙනී යන බව වකුගඩු රෝග  පිළිබඳ පර්යේෂණයන් හි යෙදෙන රජරට විශ්ව විද්‍යාලයේ වෛද්‍ය පීඨයේ ආචාර්ය ඡන්න ජයසුමන මහතා පවසයි.

කඳුකරයේ තේ වතු ආශ‍්‍රිතව වෙසෙන ජනතාව නිතර ප‍්‍රතිකාර ගන්නා රෝහල් වන නුවරඑළිය, දික්ඔය, නාවලපිටිය, බදුල්ල හා මහනුවර යන රෝහල්වල ඉකුත් වසර 10 හි දත්ත විශ්ලේෂණය කිරීමේදී මේ බව පෙනී යන බව ඒ මහතා කියයි.

එමෙන්ම මෙසේ ගලනාලයේ පිළිකා ඇතිවූ රෝගීන් අතරින් අති බහුතරය තේ දළු නෙලන කාන්තාවන් වීම ද විශේෂත්වයක් යැයි හෙතෙම පවසයි.

මේ අනුව තේ වගාවට ග්ලයිෆොසේට් යෙදීම හා ඊට නිරාවරණය වන වැඩි පිරිස තේදළු නෙලන්නියන් වීම මෙම තත්ත්වයට හේතු වන්නේ යැයි නිගමනය කළ හැකි බව ද වෛද්‍ය ජයසුමන මහතා කියයි.

මේ අතර කොළඹ විශ්ව විද්‍යාලය හා විශ්ව විද්‍යාල ප‍්‍රතිපාදන කොමිසම එක්ව පසුගිය දා බණ්ඩාරනායක අනුස්මරණ ජාත්‍යන්තර සම්මන්ත‍්‍රණ ශාලාවේ දී පවත්වනු ලැබූ වකුගඩු රෝග පිළිබඳ සමුළුවේ දී ද ග්ලයිෆොසේට් තහනම් කළ යුතු බවට නිර්දේශ වූ බව හෙතෙම පවසයි.