(ටී.කේ.ජී.කපිල )

ශ්‍රී ලංකා රුපියල් විසි තුන් ලක්ෂ විසි දහසක් නීතිවිරෝධී ලෙස ඩුබායි වෙත රැගෙන යෑමට තැත් කළ බව කියන කොළඹ ප්‍රදේශයේ ව්‍යාපාරිකයකු (46) අද (28) අලුයම කටුනායක ගුවන් තොටුපොළේ දී අත්අඩංගුවට ගත් බව රේගු මාධ්‍ය ප්‍රකාශක රේගු අධිකාරී සුනිල් ජයරත්න මහතා පවසයි.

රුපියල් 20,000 ක් පමණක් ගුවන් තොටුපොළ ඔස්සේ රටින් බැහැරට ගෙන යා හැකි බවත්  ඊට වඩා වැඩි මුදල් ප්‍රමාණයක් රැගෙන යන්නේ නම් ඒ පිළිබඳව රේගුවට ප්‍රකාශ කළ යුතු බවත් රේගු මාධ්‍ය ප්‍රකාශකවරයා පවසයි.

 
මෙම මුදල ඔහු රැගෙන ආ ගමන් මල්ලේ රුපියල් 1,000 නෝට්ටුවලින් මෙලෙස සඟවා තිබුණි .

මෙම මුදල් ඩුබායි වෙත ගෙන ගොස් එහි සේවය කරන ලාංකික ශ්‍රමිකයන්ට ලබා දෙන වැටුප් මුදල්වලට මාරු කර විදේශ මුදල් බවට පරිවර්තනය කර ගන්නා මොවුන් පසුව ඒවා ලබා දී රත්තරන්  හෙරොයින් වැනි නොයෙකුත් දෑ මිලදී ගෙන යළි ශ්‍රී ලංකාවට නීතිවිරෝධීව රැගෙන එන ජාවාරමක් ක්‍රියාත්මක  බව රේගු මාධ්‍ය ප්‍රකාශකවරයා වැඩිදුරටත් පැවසීය .
 
මේ පිළිබඳ වැඩිදුර රේගු පරීක්ෂණය නියෝජ්‍ය රේගු අධ්‍යක්ෂ ජගත් ඔබේසේකර මහතා විසින් පවත්වනු ලැබූ අතර එහිදී මෙම මුදල් තොගය රාජසන්තක කළ අතර මෙම ව්‍යාපාරිකයාට රුපියල් ලක්ෂයක දඩ මුදලක් ගෙවන ලෙසද නියෝග කෙරිණ.