(ඩයනා උදයංගනී)
          
බෙංගාල බොක්ක මුහුදු ප‍්‍රදේශයේ වර්ධනය වෙමින් පවතින පීඩන අවපාතයේ බලපෑමෙන් උතුරු, නැගෙනහිර හා දකුණු මුහුදු ප‍්‍රදේශ ඉතා රළු විය හැකි බැවින් හෙට (5) සිට මෙම මස 8 වැනිදා දක්වා එම මුහුදු ප‍්‍රදේශවල ධීවර හා නාවික කටයුතුවල නිරතවීමෙන් වළකින්නැයි කාලගුණ විද්‍යා දෙපාර්තමේන්තුව දැනුම් දීමක් කරයි.

බෙංගාල බොක්ක මුහුදු ප‍්‍රදේශයේ සුළඟේ වේගය පැයට කිලෝමීටර 90, 100 පමණ දක්වා ඉහළ යා හැකි අතර දිවයින වටා මුහුදු ප‍්‍රදේශවල ද පැයට කිලෝමීටර 70, 80 පමණ දක්වා වේගවත් තද සුළං හැකි බව ද එම දෙපාර්තමේන්තුවේ ප‍්‍රකාශකයෙක් පැවසීය.

අඩු පීඩන කලාපයක් ලෙස දැනට පවතින මෙම කලාපය හෙට (5) දිනයේ දී පීඩන අවපාතයක් බවටට පත්වනු ඇතැයි අපේක්‍ෂා කරන බව එම ප‍්‍රකාශකයා පැවසීය.

එහි බලපෑමෙන් ඉදිරි දින කිහිපයේදී දිවයින හරහා ද තද සුළං හැමිය හැකි අතර විශේෂයෙන් උතුරු, නැගෙනහිර පළාත්වල පැයට කිලෝමීටර 50, 60 පමණ වේගවත් සුළං අපේක්‍ෂා කළ හැකි බව ද ඔහු සඳහන් කළේය.

පීඩන අවපාතයේ වර්ධනය අනුව මෙම සුළං වේගය තව දුරටත් ඉහළ යා හැකි බව ද ඔහු ප‍්‍රකාශ කළේය.

මෙම පීඩන අවපාතය ඉදිරි දින තුන හතර තුළ බෙංගාල බොක්ක මුහුදු ප‍්‍රදේශය හරහා උතුරු තමිල්නාඩු ආන්ද්‍රා ප‍්‍රදේශයට ගමන් කරනු ඇතැයි අපේක්‍ෂා කරන අතර එය හෙට (5) සහ අනිද්දා (6) දිනවල ශ්‍රී ලංකාවට නැගෙනහිර දෙසින් දිවයිනට ආසන්නව ගමන් කරනු ඇතැයි අනුමාන කරන බව ද එම ප‍්‍රකාශකයා කීවේය.