( තිළිණි ද සිල්වා )
 
ලන්ඩන් සිට කොළඹ බලා පැමිණෙන ශ්‍රී ලන්කන් ගුවන් සේවයට අයත් UL 504 දරණ ගුවන් යානය ජර්මනියේ ෆ්‍රැන්ක්ෆර්ට් ගුවන්තොටුපළ වෙතට ඊයේ (1) රාත්‍රී හදිසියේ ගොඩ බස්වා තිබේ.
 
ඒ ගුවන් යානයේ ගමන් ගත් මගියකු හදිසියේ රෝගාතුර වීම හේතුවෙනි. 
 
ගුවන් යානය ෆ්‍රැන්ක්ෆර්ට් ගුවන්තොටුපළ වෙත ගොඩබැස්වූ අවස්ථාව රාත්‍රී කාලය වෙනුවෙන් ගුවන්තොටුපළ වසා දමන කාලයට ආසන්න වීම හේතුවෙන් කොළඹ බලා පියාසර කිරීම සඳහා  නැවත ගුවන්තොටුපළ විවෘත කරන තෙක් රැඳී සිටීමට සිදුවන බව ශ්‍රී ලන්කන් ගුවන් සේවය නිවේදනයක් නිකුත් කරමින් පවසයි. 
 
මේ අතර අද (2) දිනයට නියමිත කොළඹ සිට චෙන්නායි දක්වා පියාසර කිරීමට නියමිත UL 129 දරන ගුවන් යානය සහ කොළඹ සිට දිල්ලි නුවර දක්වා පියාසර කරන UL 195 ගුවන් යානය සාමාන්‍ය පරිදි ක්‍රියාත්මක කරන බව ද ශ්‍රී ලන්කන් ගුවන් සේවය වාර්තා කරයි.