(ඩයනා උදයංගනී)

හම්බන්තොට වරාය ගිවිසුම අවශ්‍ය පරිදි සංශෝධනය කිරීමේ හැකියාව ඇති බැවින් ඉදිරි පාර්ලිමේන්තු විවාදයේදී මැති ඇමතිවරුන් ඉදිරිපත් කරන අදහස් වුවත් එයට ඇතුළත් කිරීම ගැන සලකාබැලීමට රජය සූදානම් යැයි වරාය හා නාවික කටයුතු අමාත්‍ය මහින්ද සමරසිංහ මහතා පවසයි.

ඉකුත් සෙනසුරාදා සංශෝධන සහිතව අත්සන් කළ වරාය ගිවිසුම තමන් අද (1) කැබිනට් මණ්ඩලයට ඉදිරිපත් කළ බව කී අමාත්‍යවරයා එය අධ්‍යයනය කිරීමට ජනාධිපතිවරයා විසින් ඇමතිවරුන්ට සතියක කාලයක් ලබාදුන් බව ද ඒ මහතා පවසයි.

අමාත්‍යවරුන් එය අධ්‍යයනය කර ලබන කැබිනට් මණ්ඩලයේදී අදහස් දැක්වූ පසු එම සතියේම එය පාර්ලිමේන්තුවට ඉදිරිපත් කිරීමට තමන් බලාපොරොත්තු වන බව කී අමාත්‍යවරයා ඉන්පසු පක්‍ෂ නායකවරුන්ට විවාදයක් සඳහා දිනයක් තීරණය කළ හැකි බව ද පවසයි.

අමාත්‍යවරයා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද (1) පැවති මාධ්‍ය හමුවක් අමතමිනි.

අත්සන් කර තිබෙන්නේ පාර්ලිමේන්තුවට ඉදිරිපත් කළ ගිවිසුම නොවන බවට ඒකාබද්ධ විපක්‍ෂයේ අය චෝදනාවක් කරමින් සිටින බව කී අමාත්‍යවරයා එහි ඇති වෙනස වන්නේ කැබිනට් මණ්ඩලයේදී ඉදිරිපත් වූ යෝජනා සංශෝධන ලෙස ඇතුළත් කිරීම පමණක් බව ද කීවේය.