තරිඳු ජයවර්ධන

මහනුවර පල්ලේකැලේදී පිළිස්සුණු නිවසක තිබී තරුණයකුගේ මළ සිරුරක් හමුවීමේ සිද්ධිය මිනී මැරුමක් සේ සලකා විමර්ශන ආරම්භ කර ඇතැයි පොලිස් ආරංචි මාර්ග කියයි.

එම නිවසට සහ ඒ අසල කඩයට ගිනි තැබූ පිරිස් ගැන වැදගත් තොරතුරු රැසක් ලැබී ඇතැයි උසස් පොලිස් නිලධාරියෙක් ලංකාදීපයට පැවසීය. විමර්ශන සඳහා සීසීටීවී දර්ශන සහ වීඩියෝ දර්ශන උපයෝගී කර ගන්නා බව ද පොලිස් ආරංචි මාර්ග සඳහන් කරයි.

පසුගිය හය වැනි දා උදෑසන මහනුවර පල්ලේකැලේ කෙන්ගල්ල නිවසක තිබී මෙම තරුණයාගේ (26) මළ සිරුර හමු විය.  පස් වැනිදා ඇතිවූ කලබල කාරී වාතාවරණයේ දී එම තරුණයා සිටි නිවසට ගිනි තබා ඇති අතර ඔහුගේ සහෝදරයා සහ දෙමාපියන් දිවි බේරාගෙන ඇතැයි පොලිස් ආරංචි මාර්ග පවසයි.

ආබාධිත තත්ත්වයේ පසුවූ බව කියන මෙම තරුණයා  දුම ආඝ්‍රාණය වීමට නිසා මියගොස් ඇතැයි මරණ පරීක්ෂණයේදී අනාවරණය වූ බවත්, දුම ආග්‍රානය වීමට හේතුව ඔහු සිටි නිවසට ගිනි තැබීම බවත්, එම නිසා මෙය මිනීමරුමක් සේ සලකා සැකකරුවන්ට එරෙහිව මිනීමරුම් චෝදනා යටතේ ඉදිරි කටයුතු සිදු කරන බවත් පොලිසිය සඳහන් කරයි.