නිමල කොඩිතුවක්කු
 
රජයේ ආධාර ලබන පාසල් සම්බන්ධයෙන් දැනට කි‍්‍රයාත්මක පනත සංශෝධනය කිරීම පිළිබඳව ජාතික අධ්‍යාපන කොමිසම එකඟතාවය පළ කළ බව ලංකා ගුරු සංගමයේ ප‍්‍රධාන ලේකම් ජෝසප් ස්ටාලින් මහතා පැවැසීය.
 
ලංකා ගුරු සංගමයේ නියෝජිත පිරිසක් හා ජාතික අධ්‍යාපන කොමිසමේ සභාපති ආචාර්ය එස්.බී. හෙට්ටිගේ, ජාතික අධ්‍යාපන කොමිසමේ උප සභාපති ආචාර්ය ජී.බී. ගුණවර්ධන යන මහත්වරුන් සමග  අද(25) පැවැති සාකච්චාවකදී මෙම තීරණය ගත් බවද ඔහු සඳහන් කළේය.
 
ආධාර ලබන පාසල් සම්බන්ධයෙන් දැනට කි‍්‍රයාත්මක වන්නේ 1960 අංක 5 සහ 1961 අංක 8 සහ 1981 අංක 65 දණ පනත්   බවත්  මෙම පනත්වල ආධාර ලබන පාසල්වල සේවය කරන ගුරුවරුන්ගේ අයිතිවාසිකම් පිළිබඳව කිසිදු සඳහනක් නොමැති බවත් ස්ටාලින් මහතා පැවැසීය.
 
මෙම පාසල්වල සේවය කරන 8000 කට ආසන්න ගුරුවරුන් ඒ තත්වය මත පීඩාවන්ට පත්ව සිටින බවද ඒ මහතා සඳහන් කළේය.
 
එම ගුරුවරුන්ගේ අයිතිවාසිකම් හා ඔවුන්ගේ සේවා ගැටලූ සම්බන්ධයෙන් මැදිහත් වන ලෙසට ලංකා ගුරු සංගමය අධ්‍යාපන අමාත්‍යාංශයෙන් අවස්ථා ගණනකදී ඉල්ලිම් කර ඇති බවද ස්ටාලින් මහතා පැවැසීය.
 
මෙම පාසල්වල ගුරුවරුන්ගේ සහභාගීත්වයෙන් මේ පිළිබඳව විශේෂ සාකච්ඡාවක් ලබන 28 වනදින  දින ප.ව. 3.00 ට කොළඹ මහවැලි කේන්ද්‍රයේදී පැවැත්වීමට කටයුතු කරන බවද ඔහු වැඩිදුරටත් කීය.