(පියුමි ෆොන්සේකා ඉන්දියාවේ සිට)

නාවික හමුදාවේ වෙඩි ප්‍රහාරයකින් මියගිය බව කියන රාමේෂ්වරම්හී ධීවරයාගේ ඉන්දු ලංකා ආණ්ඩු නිහඬ පිළිවෙතක් අනුගමනය කළහොත් වෙඩි තැබීමට එරෙහිව එක්සත් ජාතීන්ගේ මානව හිමිකම් මණ්ඩලයට පැමිණිල්ලක් ඉදිරිපත් කරන බව ඉන්දීය ධීවර සංගම් ප්‍රකාශ කරයි. 

රාමේෂ්වරම්හි ධීවරයාගේ මරණය සම්බන්ධයෙන් පරීක්ෂණයක් කළ යුතු බවත් වැරැදිකරුවන්ට එරෙහිව නීතිය ක්‍රියාත්මක කළ යුතු බවත් ඉන්දියාවේ ජාතික ධීවර කම්කරුවන්ගේ සංසදයේ සභාපති එම්. ඉලන්ගෝ මහතා මේ සම්බන්ධයෙන් අදහස් දක්වමින් පැවැසීය.

“පශ්චාත් මරණ පරීක්ෂණයේදී ධීවරයාගේ සිරුරේ තිබී ඒ.කේ 47 ගිනි අවි සඳහා භාවිත කරන උණ්ඩ තිබී හමු වුණා. එහෙත් ලංකාවේ නාවික හමුදාව චෝදනා ප්‍රතික්ෂේප කරනවා.  එහෙනම් ඔහුට කවුද වෙඩි තිබ්බේ. මේ ඝාතනයට වරදකරුවන් කවුදැයි අප දැන ගත යුතු” යැයි එම්. ඉලන්ගෝ මහතා කීය.

දීර්ඝ කාලයක් මුළුල්ලේ පවතින ඉන්දු ලංකා ධීවර අර්බුදයට පිළියමක් සෙවීමට දෙරටේ ආණ්ඩු කඩිනමින් කටයුතු කිරීමේ අවශ්‍යතාව ද එම්. ඉලන්ගෝ තවදුරටත් පැවැසීය.