විනීතා එම් ගමගේ
 
භික්ෂුන් වහන්සේලා විසින් මේ වනවිට සකස් කරමින් සිටින ප‍්‍රතිපත්ති ප‍්‍රකාශනය පිළිගන්නා බව දළදා හිමියන් ඉදිරිපිට දී එම ප‍්‍රකාශනයට අත තබා පොරොන්දු  වන අපේක්ෂකයකුට 2020 ජනාධිපතිවරණයේ දී සහය දෙන බව බොදුබල සේනා සංවිධානයේ මහ ලේකම් ගලගොඩඅත්තේ ඥානසාර හිමියෝ පැවැසූහ. 
 
එහෙත් කිසිදු දේශපාලකයකුට ඉදිරියේ දී සහය නොදෙන බව ද උන්වහන්සේ පැවැසූහ.
 
අපේ ජාතික වැඩපිළිවෙළ පිළිබඳ බෞද්ධ කොමිෂන්  සභාවේ තියෙන දේ ක‍්‍රියාත්මක කර බෞද්ධයාට සාධාරණය ඉටු කරන කෙනෙකුට සහය දෙනවා. සංගායනවාක් සඳහා මේ රටේ සම සඟරුවන පෙළ ගැස්සවීමත් කරන බවත් ඥානසාර හිමියෝ කීහ.
 
ඥානසාර හිමියෝ මේ අදහස් පළ කළේ රාජගිරිය පිහිටි සද්ධර්මරාජික විහාරස්ථානයේ දී පැවැත්වූ බොදුබල සේනාව සංවිධානයේ විශේෂ මාධ්‍ය හමුවේ දී ය. එහිදී තවදුරටත් අදහස් දැක්වූ උන්වහන්සේ මෙසේ ද  කීහ. 
 
අපට තියෙනවා ප‍්‍රශ්නයක්. ඒක අවුරුදු විස්සක් වෙන ප‍්‍රශ්නයක්. මින් ඉදිරියට නම්  වගකීමෙන් කියනවා අපි මේ රටේ දේශපාලකයෙක් විශ්වාස කරන්නෙත් නැහැ. මේ රටේ දේශපාලනය තුළ චීවරය විනාශ කරන්නවත් උන්ගේ වලව්වල වළං බාන්නවත් දෙන්නේ නැහැ. 
 
දේශපාලන කණ්නාඩි දාගෙන ඉන්න හාමුදුරුවරුත් වග කියන්න  ඕනෑ මේ උදාවෙලා තියෙන තත්තත්වයට. නීතිය සාමය කඩා වැටිලා. අපේ දේශපාලන ධාරවේ නායකයන්ට එහෙයියන් වුණ හාමුදුරුවරු වගකිව යුතුයි. අපට අවස්ථා දෙකකදී වැරදුනා. එකක් සංවිධානය දිය වුණත් අපේ සායම  ගියත් අපට රට වැදගත්  කියලා අපි 2015 දී තීන්දුවක් ගත්තා. අපි ඒ වෙලාවේ කිව්වා නායකයෙක් නැති රටක් හැදෙනවා කියලා. අපි කිව්වා වැරදිද? නායකෙයෝ ගොඩක් වුණාම මොකුත් කරන්න බැහැ. අඩුම ගානේ හොරකමක් වත් හරියට කර ගන්න බැහැ. 
 
එදා අපි මහින්ද රාජපක්ෂ මහත්තයා දිනවන්න කියලා එයාලගෙ වේදිකාවට නගින්නේ නැතිව කවුරුත් ඈත් වෙද්දී අපි පෙනී හිටියා. දැන් කියන්නේ අපි නිසාලූ පැරදුනේ. අවුරුදු හතලිස් ගණනක් හිටි මෛත‍්‍රීපාල මහත්තයා ආප්ප කාල පනින්නේ අපි හින්ද ලූ. එතකොට ත‍්‍රිවිධ හමුදාවේ ඡන්ද හම්බප වුණේ නැත්තේ අපි හින්දලූ. මේ පාඩම් අපට සොබාදහම කියාදෙන්නේ. මේ රටේ හාමුදුරුවරුන්ට අපි සාධාරණයක් ඉටු කළ යුතුයි.