(මොහොමඩ්  ආසික්)

ගම්මිරිස් මිළ පහත වැටීමෙන් පීඩාවට පත්ව සිටින ගොවීන්ට  සහනය වශයෙන් ඔවුන්ගේ  වගාවන් සඳහා  හෙක්ටයාරයකට  රුපියල් 85,000 ක සහනාධාරයක් ලබා දීමට  තීරණය කර ඇති බව  අපනයන කෘෂිකර්ම දෙපාර්තමේන්තුවේ අධ්‍යක්ෂ ජනරාල් ආචාර්ය  ඒ.පී. හීන්කෙන්ද මහතා පැවසීය.
 
පේරාදෙණිය ගැටඹේ පිහිටි අපනයන කෘෂිකර්ම දෙපාර්තමේන්තුවේදී අද (26) වැනිදා සවස මාධ්‍ය වෙත අදහස් දක්වමින් ඒ මහතා මේ බව කීය.
 
මෙහිදී තව දුරටත් අදහස් දැක්වූ  අධ්‍යක්ෂ ජනරාල් ආචාර්ය   .ඒ.පී.හීන්කෙන්ද මහතා මෙසේද කීය.
 
මේ වසරේ මේ වන විට ලංකාව පුරාම ගම්මිරිස් අස්වැන්න  ලැබෙන බවත් එම නිසා  ලැබෙන අස්වනු ප්‍රමාණය ඉහළ ගොස් ඇති බවත්ය. මේ නිසාම ගම්මිරිස්වල මිළ අඩු වී ඇති බවද අධ්‍යක්ෂ ජනරාල්වරයා කීය. මිළ අඩුවීමක් ගැන කිව්වද ගිය වසරේ  මේ  කාලයේදීද ගම්මිරිස් කිලෝවක මිල රුපියල් 500 ක් වැනි මිළකට තිබූ  බවත් එය දෙසැම්බර් මාසය  වෙද්දී රුපිවල් 775  ක් දක්වා ඉහළ ගිය බවත් කීය.
 
එම නිසා මෙවරද ගම්මිරිස් වියලා තබා ගත හැකි නම් වැඩි මිළකට අලෙවි කර ගත හැකි බවද ඒ මහතා කීය
 
2017 වසරේ සිටම ගම්මිරිස් මිළ අඩු වීගෙන ගිය බවත් ඒ සඳහා පිළියම් වශයෙන් 2019 මාර්තුවල සහ2019 දෙසැම්බර්වල ගම්මිරිස් ආනයනය තහනම් කරමින් ගැසට් පත් නිකුත් කළ බවද අධ්‍යක්ෂ ජනරාල්වරයා කීය. රජයන් විසින්  එවන් ප්‍රතිපත්තිමය  තීරණ ගෙන ඇති බවද අධ්‍යක්ෂ ජනරාල්වරයා කීය.
 කෙසේ වුවක් මිළ  අඩු වීම නිසා  ගොවීන්ගේ ආදායම අඩු වී ඇති බවත් ඒ සඳහා  දෙපාර්තමේන්තුව වශයෙන්  සාධනීය පියවරයන් ගෙන ඇති බවත් කීය. මෙම වසරේ සිට ගම්මිරිස් ඵලදාව ලබන වගාකරුවන්ට අවුරුදු තුනකට පමණ වැඩි වගාවන් සඳහා  හෙක්යාරයකට රුපියල් 85,000 ක සහනාධාරයක්  ලබා දෙන බවද කීය. 
 
 මේ මුදල ලබා දෙනු  ලබන්නේ  වගාව නඩත්තු කරන්න බවත්   එයින් අපි බලාපොරොත්තු වන්නේ  එක ගම්මිරිස් වැලකින් ලැබෙන අස්වැන්න  දෙගුණ කරන්න  බවයි. අස්වැන්න දෙගුණයක් වනවා කියන්නේ ආදායම දෙගුණයක් වෙනවා කියන එක.මිළ අඩු වීමෙන් වන  පාඩුව මෙමගින් පියවා ගන්න පුළුවන් වෙනවා. යැයිද අධ්‍යක්ෂ ජනරාල් ආචාර්ය  ඒ.පී.හීන්කෙන්ද මහතා කීය.
 
මේ සම්බන්ධයෙන් විස්තර  ගොවි ජන සේවා මධ්‍යස්ථානවලට ගිහින්  අපනයන කෘෂි  ව්‍යාප්ති නිළධාරින්  හමුවී  ලබා ගත හැකි බවද අධ්‍යක්ෂ ජනරාල්වරයා මෙහිදී කීය.