තරිඳු ජයවර්ධන,නිමන්ති රණසිංහ
 
මාධ්‍යවේදී කීන් නොයාර් මහතා පැහැරගෙන ගොස් වද හිංසා කිරීමට ආධාර අනුබල දුන්නැයි අත්අඩංගුවට ගත් ජාතික ආරක්ෂක විද්‍යා පීඨයේ සේනා විධායක මේජර් ජනරාල් අමල් කරුණාසේකර මහතා ලබන 18 වැනි දා තෙක් රිමාන්ඩ් කරන ලෙස අධිකරණය නියෝග කළේය.
 
අමල් කරුණාසේකර මහතා පෙරේදා යුද හමුදා රෝහලට ඇතුළත් වී තිබුණු අතර ඊයේ සවස එම රෝහලට ගිය රහස් පොලිසිය ඔහු අත්අඩංගුවට ගත්තේය.
 
පොලිස් ආරක්ෂාව යටතේ එම රෝහලේ සිටි අමල් කරුණාසේකර මහතා පරීක්ෂා කර බැලූ ගල්කිස්ස අංක තුන අධිකරණයේ මහේස්ත්‍රාත්වරයා ඔහු රිමාන්ඩ් කරන ලෙස අද (6) සවස නියෝග කළේය. 

ලබන නව වැනි දා එම්ආර්අයි පරීක්ෂණයකට යළිත් යුද හමුදා රෝහලට ගෙන ඒමට අවශ්‍ය යැයි කී හෙයින් ඒ සඳහා යොමු කරන ලෙස ද බන්ධනාගාර අධිකාරීට නියෝග කළ මහේස්ත්‍රාත්වරයා අවශ්‍ය පරිදි ප්‍රතිකාර සඳහා යොමු කරන ලෙස ද කියෝග කළේය.
 
මාධ්‍යවේදීන් කීත් නොයාර් මහතා පැහැරගෙන ගොස් වද හිංසා කිරීමේ සිද්ධියට සැකපිට මීට පෙර අත්අඩංගුවට ගත් ත්‍රිපෝලි යුද හමුදා කඳවුරේ බුද්ධි අනු කණ්ඩයේ අණ දෙන නිලධාරී මේජර් බුලත්වත්ත ඇතුළු පිරිසට එම අපරාධය සිදු කිරීමට ආධාර අනුබල දුන්නේ යැයි සැකපිට මේජර් ජනරාල්වරයා අත්අඩංගුවට ගත්තේය.
 
මීට පෙර රහස් පොලිසිය කළ ඉල්ලීමක් සළකා බැලූ අධිකරණය කරුණාසේකර මහතාගේ විදෙස් ගමන් ද තහනම් කර තිබිණි.  

ශ්‍රී ලංකා යුද හමුදාවේ මාණ්ඩලික ප්‍රධානී ලෙස කටයුතු කළ ඒ මහතා විශ්‍රාම ගැනීමත් සමඟ ජාතික ආරක්ෂක විද්‍යා පීඨයේ සේනා විධායක ලෙස පත් කරනු ලැබීය.