(උපාලි ආනන්ද)

අනුරාධපුර මහ නගර සභාවේ සිදුව ඇති බව කියන රුපියල් තුන් කෝටි අසූ හත් ලක්ෂ අනූ හතර දහස් අසූ දෙකක (3879482) මූල්‍ය වංචාව සම්බන්ධයෙන් සැකපිට අත් අඩංගුවට ගෙන අධිකරණයට ඉදිරිපත් කළ  තවත් සැකකාරියක සහ සැකකරුවෙකු මේ මස 24 වන දින දක්වා රිමාන්ඩ් කරන ලෙස අනුරාධපුර අතිරේක මහේස්ත‍්‍රාත් සහ අතිරේක දිසා විනිසුරු හේමන්ත පුෂ්පකුමාර මහතා අද  (15) නියෝග කළේය.

මෙසේ  රක්ෂිත බන්ධනාගාර ගත කරනු ලැබුයේ  මෙම මහ පරිමාණ මූල්‍ය වංචාව සම්බන්ධයෙන් මීට පෙර රහස් පොලිසිය මගින් සැකපිට අත් අඩංගුවට ගෙන රිමාන්ඩ් කර සිටින අනුරාධපුර මහ නගර සභාවේ  වැටුප් විෂය බාර නිලධාරිනියගේ සහෝදරයෙකු වන පෞද්ගලික ආයතනයක සේවය කරන අනුරාධපුර තිසාවැව නිවාස 60 අංක 4 ලිපිනයේ පදිංචි අසංක ප‍්‍රසාද් අමරසිංහ සහ අනුරාධපුර මහ නගර සභාවේ සේවිකාවක  වන අනුරාධපුර අභයගිරි පාර කුට්ටම්පොකුණ අංක 212/2 ලිපිනයේ උඩවත්තේගෙදර ලෝකානන්ද පද්මිණි යන  දෙදෙනායි.

මෙම මූල්‍ය වංචාව සම්බන්ධයෙන් චෝදනා ලැබ රහස් පොලිසිය මග හරිමින් සැඟව සිටින ප‍්‍රධාන සැකකාර වැටුප් විෂය බාර නිලධාරිනියගේ සැමියා වන අනුරාධපුර  මහ නගර සභාවේ  ආදායම් පාලක ඩී එම් ආර් සම්පත් අනුරාධ කුමාරසිංහ නැමැත්තාට විදේශ ගතවීම වළකාලමින්  තහනම් නියෝගයක් නිකුත් කළ අතිරේක මහේස්ත‍්‍රාත්වරයා මෙම තහනම් නියෝගය නොපමාව  ආගමන විගමන පාලකරයාට යවන ලෙසට අධිකරණයේ රෙජිස්ට‍්‍රාර් ජයන්ත මහතාට තවදුරටත් නියෝග කෙරිණි.
 
සැඟව සිටින ආදායම් පාලකවරයා වහාම අත්අඩංගුවට ගෙන අධිකරණයට ඉදිරිපත් කරන ලෙසටද රහස් පොලිසියට නියෝග කරනු ලැබීය.

සැකකාරිය සහ සැකකරු අධිකරණයට ඉදිරිපත් කරමින් රහස් පොලිසිය සඳහන් කළේ අනුරාධපුර මහ නගර සභාවේ සිදුව ඇති බව කියන මෙම මහ පරිමාණ මූල්‍ය වංචා සිද්ධිය සම්බන්ධයෙන් දැනට රිමාන්ඩ් කර සිටින එම මහ නගර සභාවේ වැටුප් විෂය බාර නිලධාරිනිය විසින් නගර සභාවට අයත් රුපියල්  විසි ලක්ෂ හැත්තෑ හතර දහස් තුන්සිය දෙකක (2074302) මුදලක් ඇගේ සහෝදරයකු වන අසංක ප‍්‍රසාද් අමරසිංහ  නැමැතතාගේ  නමින් ඇති බැංකු ගිනුමකට බැර කර ඇති බවයි 

තවත් රුපියල් දහ නව ලක්ෂ විසි පන්  දහස් තුන් සිය පහක (1925305) මුදලක් අනුරාධපුර මහ නගර සභාවේ සේවිකාවක වන උඩවත්තේගදෙර ලෝකානන්ද පද්මිනි යන අයගේ ගිනුමකට වැටුප් විෂය බාර නිලධාරිනිය විසින්  බැර කර ඇති බවද රහස් පොලිසිය අධිකරණයට සැලකළේය. මෙම මූල්‍ය වංචාව සම්බන්ධයෙන් තවදුරටත් පුළුල්

විමර්ශනයක් සිදු කරමින් පවතින බවද කියා සිටි රහස් පොලිසිය  එසේ හෙයින්  මෙම සැකකරු සහ සැකකාරිය රිමාන්ඩ් කරන ලෙසද  අධිකරණයෙන් අයැද සිටියේය රහස් පොලිසියේ සහකාර පොලිස් අධිකාරි මොහාන් සිරිවර්ධන මහතාගේ උපදෙස් මත උප පොලිස් පරික්ෂක බස්නායක මහතා සැකකාරිය සහ සැකකරු අධිකරණයට ඉදිරිපත් කරමින් කරුණු දැක්වීය.

මූල්‍ය වංචාවට අදාළව රිමාන්ඩ් කර සිටින වැටුප් විෂය බාර නිලධාරිනියගේ නමින් විවිධ රාජ්‍ය සහ පෞද්ගලික බැංකුවල පවත්වා ගෙනයන බැංකු ගිණුම් 110 ක් පරික්ෂා කිරීමට මීට පෙර රහස් පොලිසියට අධිකරණයේ අවසරය ලබාදුන් අතිරේක මහේස්ත‍්‍රාත් හේමන්ත පුෂ්පකුමාර මහතා    විමර්ශන සිදු කිරීමේදී අදාළ බැංකු ගිණුම්වලට අදාළ  තොරතුරු   රහස් පොලිසියට ලබා දෙන ලෙසටද සියළු  රාජ්‍ය සහ පෞද්ගලික බැංකුවල කළමනාකාරිත්වයටද  තවදුරටත් නියෝග කරනු ලැබීය.