හොරණ නවෝදය මෙහෙය වූ රයිගම් කෝරළයේ මහා බක්මහ උළෙල කාගේත් විශේෂ අවධානයට යොමු වූ මෑත යුගයේ පැවති වැදගත්ම අවුරුදු උත්සවය ලෙස සැලකිය හැකිය. බක්මහ උළෙලට අදාළ වූ සියළුම පාරම්පරික ක‍්‍රීඩා තරගයන්ගෙන් සම්පූර්ණ වූ මෙම උළෙල අලිරේස්, අශ්ව රේස්, අංගම්පොර සටන් ආදී අංගවලින් ද වර්ණවත් විය. රයිගම් කෝරළයේ අවුරුදු කුමාරි තරගය, කිලෝ මීටර 152 පුරා පැද ගිය මහා පාපැදි ධාවන තරගය, මැරතන් ධාවනය, ලිස්සන ගසේ නැගීම, කොට්ට පොරය, අයිල කරත්ත සන්දර්ශනය, කතුරු ඔන්චිල්ලාව, කඹ ඇදීම, කණා මුට්ටිය බිඳීම, ළමයින් සඳහා වෙන්වූ තරග, කැවුම්, කොකිස්, අතිරස ඉවීමේ දර්ශනය හා එම සිංහල රසකැවිලි සහ කිරිබත් කෙසෙල් ගෙඩි ඔසු කැඳ ජනතාවට අනුභව කරන්නට බෙදා දීම. ආදී ජාතියේ අනන්‍යතා සිදුවීම් මෙම බක්මහ උළෙලේදී දක්නට ලැබිණ. හොරණ නගර සභා ක‍්‍රීඩාංගණයේදී දවසක් පුරා පැවති මෙම උළෙල සාර්ථක කිරීම පිණිස මහ පරිමානයේ ත්‍යාග මුදල් හා ත්‍යාග භාණ්ඩ හොරණ ප‍්‍රදේශයේ ව්‍යාපාරික ප‍්‍රජාව විසින් අත දිගහැර පරිත්‍යාග කර තිබුණි. උළෙල සංවිධානය කළේ හොරණ නවෝදය සංවිධානයේ නිර්මාතෘ කළුතර දිස්ත‍්‍රික් පාර්ලිමේන්තු මන්ත‍්‍රී හොරණ ශ්‍රී ලංකා නිදහස් පක්ෂ සංවිධායක විදුර වික‍්‍රමනායක මහතාගේ පුරෝගාමීත්වයෙන්ය. රයිගම් කෝරළ අවුරුදු කුමාරි තරඟය සඳහා 28 දෙනෙකු තරග වැදුනාහ. එයින් දස දෙනෙකු තෝරාගනු ලැබූ අතර ඒ අතරින් දිනූ තිදෙනෙකු ප‍්‍රථම, දෙවැනි හා තෙවැනි ස්ථාන දිනාගත්හ. වෑවල ටී.ඞී දේවිකා දිල්හානි (22) රයිගම් කෝරළයේ අවුරුදු කුමාරිය ලෙස අභිසෙස් ලැබූ අතර පොකුණුවිට නිහාරා මධුෂානි (21) දෙවැනි ස්ථානය ද හොරණ සින්දුජා ශ්‍රී භාග්‍යා තුන් වැනි ස්ථානය ද ලැබූහ. මෙම තිදෙනාට පිළිවෙලින් රුපියල් පනස් දහස, තිස් දහස හා විසි දහස බැගින් හා තවත් බරටම ත්‍යාග පිරිනැමිණි. දස වෙනියා දක්වා ද විශේෂ ත්‍යාග පිරිනැමින. ජනතාවට අස්ව රේස් දකින්නට ලැබෙන්නේ කලාතුරකින් ය. හොරණ නගර සභා ක‍්‍රීඩාංගනයේ මෙම අවුරුදු උළෙලේදී අශ්ව රේස් එකකින් වර්ණවත් විය. හොරණ නගරයෙහි පැවති කිසිදු අවුරුදු උළෙලකදී කතුරු ඔන්චිල්ලාව ඉදිවුනේ නැත. එහෙත් රයිගම් කෝරළ අවුරුදු උළෙල කතුරු ඔන්චිල්ලාවකින් අලංකාරවිය. එම ඔන්චිල්ලාව විවෘත කළේ මෙම උත්සවයේ උපදේශක පාරේලිමේන්තු මන්ත‍්‍රී විදුර වික‍්‍රමනායක මහතාය.

සටහන - හොරණ විජේරත්න  ඕපනායක / ඡායාරූප - විජේරත්න  ඕපනායක සහ නිමාලි කහවල