ටයිටේනියම් සහ රත්‍රන් යන ලෝහ දෙක මිශ්‍ර කිරීමෙන් ඉතාමත් තද බවින් යුතු සුපිරි ලෝහයක් නිපදවීමට ඇමරිකාවේ හූස්ටන්හි රයිස් විශ්ව විද්‍යාලයේ විද්‍යාඥයින් පිරිසක් සමත්ව ඇතැයි සයන්ස් ඇඩ්වාන්ස් සඟරාව වාර්තා කර තිබේ.

ඇමරිකා භෞතික විද්‍යාඥයින් පවසන්නේ මෙම ද්‍රව්‍ය ටයිටේනියම් වලට වඩා හතර ගුණයක දැඩි බවකින් යුක්ත බවයි. මෙය ජීවී පටක වලට ඉතා හොඳින් ගැලපෙන ලෝහයක් නිසා වෛද්‍ය විද්‍යාත්මක කටයුතු වලදී යොදා ගැනීමට සුදුසු බවද ඔවුන්ගේ මතයයි.

 දණහිස් හා උකුල් සන්ධි සැත්කම් සඳහා මෙතෙක් යොදාගත් ලෝහ කොටස් අවුරුදු දහයකට වරක් මාරු කිරීමට වෛද්‍යවරුන්ට සිදු විය. ඒ සඳහා රත්‍රන් ඇලුමීනියම් මිශ්‍ර ලෝහය යොදාගතහොත් ජීවිතාන්තය දක්වා දිරාපත් නොවී පවතිනු ඇති බව පරීක්ෂණය සිදු කළ කණ්ඩායමේ මහාචාර්ය එමීලියා මොරොසන් පවසයි. එසේම ඇය පවසන්නේ දන්ත වෛද්‍ය කටයුතු වලදී ද විදීමේ යන්ත්‍ර සඳහා ද ක්‍රීඩා උපකරණ සඳහා ද මෙම නව ලෝහය ඉතා ප්‍රයෝජනවත් වනු ඇති බවයි.