තමා සේවය කරන ආයතනයට රෑ මැදියමේ හොර රහසේම ඇතුළු වී එහි සරුවට වැවී තිබූ පොල් ගසක ගෙඩි කඩන්නට ගසට ගොඩ වූ තරුණයකුට තම විදුලි පන්දම දල්වා පොල් කඩන්නට උදව් කර පොල් ටික අහුලා මල්ලටකද දමා දුන් ආරක්ෂක සේවයකු පිළිබඳ පුවතක් වාර්තා විය.

අදාල ආයතනයේ සේවක මහතකුගෙන් අසා දැනගත් අන්දමට සිද්ධිය මෙසේය.

එය රාත්‍රි සේවා මුරයක් ද ක්‍රියාත්මක වන ඌව පළාතේ රාජ්‍ය ආයතනයකි. එහි කටයුතු පහසුවීම සඳහා මෙන්ම ආරක්ෂාව සඳහා එක්තරා ආරක්ෂක සමාගමක් මගින් ආරක්ෂක නිලධාරියකුගේ සේවය ද ලබා දී තිබිණි.

කෙසේ වෙතත් අදාල ආයතනයේ ගොඩනැගිල්ලක් පසු පස වැඩී තිබූ පොල් ගසක සරුවට හටගෙන තිබූ පොල් වල්ලකට ඇස ගසාගෙන සිටි ගමේ තරුණයකු පසුගිය දිනෙක මැදියම් රැයේ අදාල ආයතනයට ඇතුළු වූයේ හොර රහසේම පොල් වල්ල කඩාගෙන යාමේ අටියෙනි.

මුලින්ම ආරක්ෂක නිලධාරියා සමඟ කුලුපඟ වූ හෙතෙම ඔහුට රුපියල් සීයයක්ද මිට මොලවා තමන් පැමිණි කාරණාවද විස්තර කළේ ආරක්ෂක නිලධාරියාගේ පූර්ණ රැකවරණයද අවශ්‍ය බව පවසමිනි.

පොල් වල්ල බෑමේ අදහසට ආරක්ෂක නිලධාරියාගෙන් ද විරෝධයක් එල්ල නොවිණි.

ඒ වෙනුවට තරුණයා පසුපසින් ගිය ආරක්ෂකයා තරුණයාට පොල් ගඩි ටික හොයා ගන්නට තම විදුලි පන්දම අල්ලා උපකාර කරන්නට ද කාරුණික වූයේ තම රාජකාරිය පවා අමතක කරමිනි. විදුලි පන්දම ඇල්ලීමෙන් සෑහීමකට පත් නොවූ හෙතෙම බිමට වැටුණු පොල් ගෙඩි ටික ද තරුණයාට එකතු කර දුන්නේය.

කෙසේ වෙතත් පසුදින වෙද්දී එය ආයතනයට රහසක් නොවූ අතර අදාල ආරක්ෂක නිලධාරියාගෙන් විමසීමේදී ඔහු ඇඟට නොදැනී පවසා ඇත්තේ “මට රුපියල් සීයයකුයි පොල් ගෙඩි දෙකකුයි දුන්නා. පිහි පාරක් කනවාට වඩා ඒක හොඳයි” යනුවෙනි.

(වියලුව වාර්තාකරු)