සැමියා පරීක්ෂා කරවන්නට මිතුරියට බාර කළ බිරියකට සැමියා සදහටම අහිමිවූ සිද්ධියක් නදියක් අසබඩ ගම්මානයකින් වාර්තාවේ.

ආදර සම්බන්ධයකින් එක්වූ යුවලකි. තවම දරු මල්ලන්ද නැත. සැමියා රජයේ රැකියාවක නිරතය. උදේ රැකියාවට යන ඔහු සවසට ඉක්මනින් ගෙදර එන්නේ නිවසේ හුදෙකලාව සිටින බිරියගේ පාළුව මකා කල් ගත කරන අදහස ඇතිවමය. ඔහු ඒ තරමට බිරියට ආදරය කළේය.

බිරියට සිය සැමියා ගැන කිසියම් කුකුසක් ඇතිවුණේය. සිතේ තෙරපා ගෙන සිටි මේ කුකුස මිතුරියකට හෙළි කළාය. ‘‘අනේ මට මෙයා ගැන සැකයි’’ ඇය මිතුරියට කීවාය. වෙන්න බැහැ. ‘‘එයා හරිම හොඳයි’’ මිතුරිය කීවේ අවංක අදහසිනි. ‘‘ඒකට කමක් නැහැ. එයා ඔයාව දන්නේ නැහැනේ. ඉඳහිට ටිකක් කතා බහ කරලා බලන්න මෙන්න අංකය’’ ඇය සැමියාගේ ජංගම දුරකථන අංකය මිතුරියට දුන්නාය.

මේ ඉල්ලීම නිසා බිරියගේ මිතුරිය ඉඳ හිට ඔහුට කතා කරන්නට වූයේ කැමැත්තකින් ද නොවේ. මිතුරිය වෙනුවෙන් උපකාරයක් කරන අදහස ඇති නිසාය. ඉඳහිට කතා කළත් ඔහුගෙන් ඇයට අනුබලයක්ද ලැබුනේ නැත. ඈ මේ බව මිතුරියට කීවත් ඇය ඉල්ලා සිටියේ තව දුරටත් කතා බහ කැරමින් විමසිලිමත් වන ලෙසය. මේ ඇමැතුම් ලැබීම සැමියාට කරදරයක් වූයේය. ඔහු මේ ගැන පොලීසියට පැමිනිල්ලක් කරමින් මේ කරදරකාරි ඇමතුම් නවතා දෙන ලෙස ඉල්ලා සිටියේ ඔහුට කාන්තාව කතා කරන අංකයද ලබා දෙමිනි.

මූලික විමර්ශනයෙන් පසු දෙපක්ෂය කැඳවිණි. සැමියා සමග බිරියද පොලීසියට ගියාය. විත්තිියට ආවේ බිරියගේ මිතුරියය. මිතුරියට පොලීසිය අවවාද කරද්දී ඇය සියල්ල හෙළි කළාය.

මෙතරම් ආදරයෙන් සිටින තමා විශ්වාස නැති නම් දැන්ම ඉවත් වෙන ලෙසට සැමියා බිරියට කීවේ හැඟුම්බරවය. මෙසේ නිකරුනේ තමන් සැක කරන බිරියක ගැන තමන්ට විශ්වාසයක් නැති බවද ඔහු කීවේය. මෙතැන් සිට තමන් තනිකඩ දිවියක් ගත කරන බව කී සැමියා පොලීසියෙන් පිටව ගියේ බිරිය දෙසවත් නොබලමිනි. නිකරුනේ ඇති කරගත් සැකයක් නිසා ඇයට අන්තිමේ සිය ආදර සැමියාද හොඳම මිතුරියද අහිමිව යළි මවුපිය සෙවණට ගොස් දැන් කාලය ගත කරන්නේ හැඬූ කඳුළින් යුතුවය.