(කටුගස්තොට ධම්මික ගුණවර්ධන)
තම පිං ගොන් වස්සට කොස් ගෙඩි කඩා කපා දීමට කොස් ගසකට නැගි පුද්ගලයකුට ඉන් බැසීමට ආධාර ලැබෙන තුරු මුළු දවසක් ගස උඩ සිටීමට සිදුවීමේ පුවතක් කන්ද උඩරට ගම්මානයකින් වාර්තාවේ.

වාර්තාවන අන්දමට සිදුවී ඇති සිද්ධිය සැකවින් මෙසේයි. මරණයෙන් නිදහස් කරනු ලැබූ ගොන් වස්සකු ස්ව කැමැත්තෙන්ම රැක බලා ගැනීමට ඔහු ඉදිරිපත් වූයේ එය මහත් ඵල මහානිසංස දෙන පුණ්‍ය කර්මයක් නිසාය.

ටික දිනක්යත්ම මුරණ්ඩු ගති පෙන්නූ ගොන් වස්සා ගමෙන් ඈත හුදකලා පෙදෙස්ම තෝරා බැඳ දැමීමට ඔහු තීරණය කළේ කාගෙ කාගෙත් ආරක්ෂාවටය.

මෙසේ දිනක් එසේ රැගෙන ගිය ගොන් වස්සාට අසල තිබූ කොස් ගසක ගෙඩි කිහිපයක් කඩා දීමට අදහස් කළ ඔහු එම ගසට නැගීම සඳහා ආසන්නයේම තිබූ උණ පඳුරකින් ගසක් කපා එය කොස් ගසට නැගීමට ආධාරකයක් ලෙස තබා ගැනීමට සිදුවූයේ ඒ තරම්ම එම කොස් ගස විශාල වූ බැවිනි.

ගසට නැගි ඔහු කොස් ගෙඩි කිහිපයක් කැඩූ සැනින් එය කෑමට දැඟලූ ගොන් වස්සා නිසා හදිසියේම කොස් ගසට තබා තිබූ උණ ගස වැටී ගියේ ඔහුට දෙවියන් ද සිහි ගන්වමිනි.

මේ අතර ගොන් වස්සා බැඳීමට ගිය ඔහු නැවත නිවසට නොපැමිණීම පිළිබඳව කලබල වූ නිවැසියන් අසල්වාසීන් කිහිප දෙනෙකු සමග හුළු අතු පවා දල්වා ගනිමින් ඔහු සොයා ගියේ ගොම්මන් වැටෙන රාත්‍රිය ද උදාවෙමින් තිබියදීය.

එසේ ගිය ඔවුනට ඈත ගම් කෙළවරින් නැගුනු හූ හඬක් ඔස්සේ විපරම් කිරීමේ දී කොස් ගස උඩ සිටි අදාළ පුද්ගලයා සොයා ගැනීමට හැකිවී ඇති අතර අනතුරුව උණ ගසේ ආධාරයෙන්ම ඔහුව බිමට බස්සවාගෙන ඇත්තේ ඔවුන් ඔහුටද දෙස් දෙවොල් තබමින් බව වැඩිදුරටත් අනාවරණය විය.