අවුරුදු සාදයකදී වෙරිවූ සැමියා පොලිසියෙන් බේරීමට කළ උපාය වැරදි ලෙසට වටහාගත් බිරිය ඔහු රෝහල් ගත කිරීමට ගත් උත්සාහයක් නිසා සැමියාට වෙරි සිඳුණු සිද්ධියක් කොළඹට ආසන්න ප‍්‍රදේශයකින් අසන්නට ලැබුණි.

ඔහු මිතුරෙකුගේ ආරාධනාවකට අනුව සාදයකට ගොස් මත්පැන් පානය කර ඇත. සාදය අවසන්වී මිතුරකු සමඟ යතුරුපැදියකින් නිවසට පැමිණීමට සූදානම් වනවිට මිතුරකු ඔවුන් අමතා මචං පොලිසියෙන් ඉන්නවා පරෙස්සමින් පලයල්ලා කියා ඇත. නෑ මචං අපි පොඩි වැඩක් කළා අවුලක් නෑ. දැන් ගඳ එන්නේ නෑ කියා පිටත්වගොස් ඇත.

පිටුපස සිටි මිතුරා ඔහුගේ නිවසට ඇරලවූ ඔහු නිවසට පැමිණිවිට බිරිය ඉදිරියට පැමිණ මොකද අනේ මේ කරගත්තේ ඇයි ලාම්පුතෙල් බිව්වේ. අරක්කු කියලා වැරදිලා පෙවුණද? කියා ප‍්‍රශ්න කර වෛද්‍යවරයකුට පෙන්වීමට සූදානම් වී ඇත.

නෑ නෑ කලබල වෙන්න එපා. පොඩි උපායක් කළා. මට කරදරයක් නෑ. දොස්තරලට පෙන්වන්නවත් කෑගහන්නවත් එපා. මට කිසිම අමාරුවක් නෑ. කට සේදුවා විතරයි කියා පැවසීම නිසා සැමියා රෝහල් ගත කිරීම අත්හැර දමා ඇත.