කොළඹට ආසන්න ප‍්‍රදේශයක නිවෙසක ජීවත් වූ මවක මිය ගියේ දූ දරුවන් දුකට පත් කරමිනි.
පවුල් පන්සල් වී ඇති දූ දරුවන් සිය මවගේ දේහය ඉදිරියේ වැළපෙන්නට වූයේ අවමඟුලට එන හිතවතුන්ට පවා පාලනය කොටගත නොහැකි තරම් වේදනාවෙන් දඟලමිනි.
එක් දියණියක් සිය මවගේ දේහය රැගෙන යන්නට නොදෙන බව පවසමින් කෑ ගසා විලාප දුන් අතර තවත් දියණියක් තමාද මව සමඟ යන බව පවසමින් විලාප දෙන්නට වූවාය.
රාත‍්‍රියේ දේහය නිවෙසට ගෙන එන මොහොතේත් ගිගුරුම් දෙමින් වැස්ස ඇදහැලෙන්නට වූයේ නිවෙසේ විදුලියද විසන්ධි කරමිනි.
දේහය තැන්පත් කොට තිබූ මැද සාලයෙන් අඬා වැටෙන දියණියන්ගේ හඬ එක වරම වෙනස් ස්වරූපයෙන් අමුතු ශබ්දයක් සමග ‘බුදු අම්මෝ’ කියමින් උස් ස්වරයෙන් ඇසෙන්නට වූයෙන් නිවැසියන් කලබලයට පත්ව හිස හැරුණු අත දුවන්නට විය. ඒ මියගිය කාන්තාව පෙට්ටියෙන් නැගිට එනවා යැයි බියෙන් තැතිගෙනය.
වැස්ස පවා නොතකා නිවැසියෝ හිස් ලූ ලූ අත දිවූහ.
විදුලිය ටික වෙලාවකින් පැමිණි පසු සිදු වූ කාරණය සියල්ලන්ටම වැටහිනි. විදුලිය විසන්ධි වූ මොහොතේ කලබලයට පත්වූ නිවැසියකුගේ ඇගේ වැදී මිනී පෙට්ටියේ පියන බිම වැටී තිබුණි.
මිය ගිය මව සමඟ යන්නටත් මවගේ දේහය රැගෙන යන්න ඉඩ නොදෙන බවත් කිව් දියණියන් ගොළුවී බලා සිටියේ අඬා වැළපෙමින් කිවූ දේ කරන්නට බැරි බව වටහා ගත් හෙයිනි.