දකුණු පළාතේ උපනගරයක් ආසන්නයේ වූ නිවසකි. මුදල් ගැටලුවක් නිසා උදේ පාන්දර අඹුසැමියන් අතර ගැටුම උත්සන්න වී උණුසුම් වචන හුවමාරු වන විට එතැන සිටි පොඩි දුව රැගෙන සීයා මිදුලට බැස්සේ නරක වචන ඇයටත් ඇසේ දැයි බියෙනි. දුවගේ අවධානය වෙනතකට යැවීමට සිතූ සීයා ඇයට මෝඩ ගමරාළ හා යකාගේ කතාව කියා දුන්නේය.

මොහොතකින් ගෙතුළින් ආ උණුසුම් වචන අඩුවිය. සියා මදක් ඉවතට ගිය අතර දුව මව සොයා කුස්සියට දිවගොස් යකා කියන්නේ මොකාටදැයි ඇසූ කළ යකාද යකා ඔන්න ඉස්සරහ කාමරේ ඉන්නවා කීවේ කෝපයෙනි. ඇය ඉස්සරහ කාමරයට දිව ගොස් යකා මෙතැන ඉන්නවා දැයි පියාගෙන් ඇසූ විට යකා නං මෙතැන නෑ ඒත් යකින්නියක් නං අන්න කුස්සියේ ඉන්නවා කීය. යළි කුස්සියට දිව ගිය ඇය මවගෙන් යකින්නි කියන්නේ කාටදැයි ඇසුවාය. කෝපයට පත්වූ මව කරුණු තේරුම්ගෙන යනව යන්න මෙතැනින් කීවේ කෝපයෙනි.

මොහොතකින් සීයා සොයා ගිය දැරිය සීයේ යකින්නි කියන්නේ කාටදැයි නැවත ඇසුවාය. යකින්නි කියන්නෙ යකාගෙ ගෑනු සතාට. සියා කියත්ම මදක් කල්පනා කළ දැරිය හරි මේ ගෙදර ඒ දෙන්නම ඉන්නවා කීවේ තරමක උස් හඬිනි. මෙය ඇසෙන මානයේ සිටි මවට පියාට මෙන්ම සියාටත් දෙවියන් සිහි උනාලු.

(තිහගොඩ උපසේන ලියනගම)